Almaty qutqarýshylary «jabaıy» jaǵajaılarda nege shomylýǵa bolmaıtynyn aıtty
Óńirlik kommýnıkatsııalar qyzmetiniń brıfınginde 9 maýsymda ótken Almaty qalasy Tótenshe jaǵdaılar departamenti basshysynyń orynbasary, Erlan Álibekov qala turǵyndaryn sýdaǵy qaýipsizdik erejelerin saqtaýdy, tyıym salynǵan oryndarǵa barmaýdy eskertti.
Erlan Álibekovtiń aıtýynsha, barlyq qutqarýshylar qala turǵyndarynyń «jabaıy» jaǵajaılar men demalys oryndaryna barýyna alańdaıdy. Sebebi, keıbir jaǵajaılarda sý aǵyny qatty, tereńdiktiń kúrt ózgerýine yqpal etetin jartastar, synǵan plıtalar men áınek bolýy múmkin.
Spıker búginde Almaty qalasynda shomylýǵa ruqsat etilgen 4 oryn baryn eske saldy, olar:
1. Saıran kóli – Tóle bı kóshesinen ońtústik baǵytta 200 metr – Almaly aýdany;
2. Saıran kóli – Tóle bı kóshesinen pırske deıin ońtústik baǵytta 300 metr – Áýezov aýdany;
3. D. Qonaev atyndaǵy ÚAK – Baým toǵaıy – Túrksib aýdany;
4. D. Qonaev atyndaǵy ÚAK – demalys aımaǵy Gúlder – Jetisý aýdany.
Saıran kóliniń ruqsat etilgen jerlerinde shyǵys pen batys jaǵynan býıkalar ornatylǵan.
Úlken Almaty kanalyna (Baým toǵaıy, Gúlder demalys aımaǵy qaıta qurýǵa baılanysty) osy jyly sý toltyrý josparlanbaǵan.
Erlan Álibekovtiń aıtýynsha, «jabaıy» jaǵajaılarda shomylý qaıǵyly oqıǵalarǵa ákelýi múmkin. Ata-analar jazǵy demalys kezinde balalardyń qaýipsizdigine jete nazar aýdarýy tıis.
Onyń pikirinshe, tájirıbe men baqylaýǵa qaramastan qaıǵyly oqıǵalar erejeniń buzylýynan bolady.
Tótenshe jaǵdaılar departamentiniń qyzmetkerleri polıtseılermen birlesip kún saıyn QR ákimshilik kodeksiniń 440-baby boıynsha (spırttik ishimdikter ishý nemese qoǵamdyq oryndarda mas kúıde bolý) tártip buzǵandardy ákimshilik jaýapkershilikke tartýda ári sý aıdyndarynyń aýmaǵynda patrýlder kezekshilikterin atqarýda. Jaz maýsymynda tártip buzǵan 15 adamǵa aıyppul salyndy.
Almaty qalasynyń Saıran kólinde qutqarý qyzmetiniń maýsymdyq beketi qoıylyp, shomylýǵa tyıym salatyn 14 taqtaısha ornatyldy. Áýejaı kólinde statsıonarlyq qutqarý beketi jumys isteıdi. Sondaı-aq osy jazda Almaty sý aıdyndarynda qutqarýshylar, sýda qutqarý jasaǵynyń qyzmetkerleri, polıtsııa qyzmetkerleri men QR Ulttyq ulanynyń №5571 «Ońtústik» bóliminiń áskerı qyzmetshileri kezekshilik etedi. Endi qutqarýshylar tek qaıyqtarmen ǵana emes, dronnyń kómegimen de qaýipsizdikti qadaǵalaıtyn bolady.
Sonymen qatar, spıker sý aıdyndarynda saqtalýy tıis birneshe talaptardy atady.
«Ruqsat etilgen jerde ǵana shomylyńyz, jaǵalaýdyń qorshaý belgileri men býıkalarynan alys júzýge bolmaıdy. Eger siz ruqsat etilgen jerde shomylsańyz, belden joǵary sýǵa túspeńiz. Balalardy qaraýsyz qaldyrmańyz. Qaıyqtardan, kópirler men aılaqtardan sýǵa sekirmeńiz. Túngi ýaqytta, taý ózenderinde mas kúıinde shomylmańyzdar»,– dep eskertti Almaty qalalyq TJD bastyǵynyń orynbasary.
Óz kezeginde Almaty qalasy Bilim basqarmasynyń adamgershilik-rýhanı tárbıe men ózin-ózi taný bóliminiń basshysy Nurgúl Taý ata-analardy balalardy sý aıdynyndaǵy talapty buzbaýǵa, kóshe men úıdegi qaýipsizdik erejelerin oryndaýǵa shaqyrdy.
