Almaty qutqarýshylary shomylýshylarǵa sýdaǵy qaýipsizdik erejelerin túsindirý sharasyn qolǵa aldy
ALMATY. QazAqparat - Almaty qalalyq Tótenshe jaǵdaılar jónindegi departamentiniń aýdandyq bólimderiniń ınspektorlary QR ІІM Tótenshe jaǵdaılar jónindegi komıtetiniń respýblıkalyq jedel-qutqarý jasaǵy, jergilikti polıtsııa qyzmeti jáne «Almaty qalasynyń qutqarý qyzmeti-109» mekemesiniń qyzmetkerlerimen birlesip, qaladaǵy sý aıdyndaryna sholǵyn júrgize bastady. Ondaǵy maqsat - demalýshylarǵa sýdaǵy qaýipsizdik erejelerin túsindirý.
Bul týraly búgin Almaty qalalyq TJD resmı ókili Sandýǵash Baımuhanbetova málim etti.
Sý aıdyndarynyń qatarynda Úlken Almaty, Esentaı, Prohodnaıa, Kishi Almaty ózenderi, sondaı-aq, Saıran, Bent, Áýejaı kólderi jáne Úlken Almaty sý arnasy bar.
Sý aıdyndarynyń kóbisi shomylýǵa arnalmaǵan. Biraq, soǵan qaramastan, balalar da, eresekter de baryp, sýǵa shomylatyndary jasyryn emes.
Osyǵan baılanysty, Almaty qalasynyń Tótenshe jaǵdaılar jónindegi departamenti ata-analardy saq bolýǵa shaqyrady.
«Balalaryńyzǵa kóńil bólińizder. Olardyń jaz ýaqynda qaı jerde nemen aınalysyp júrgenin surańyzdar. Balalaryńyzben taǵy da sóılesip, olarǵa saqtyq joldaryn túsindirińizder. Sý jaǵasyna jalǵyz ózderin jiberýge bolmaıdy. Sýda shomylǵanda tentektik jasaýǵa jol bermeńizder. Balalaryńyzdy kózden tasa etpeńizder. Olarmen jıi áńgimelesý qajet», - delingen habarlamada.
Qutqarýshylar sholǵyn júrgizý barysynda sý jaǵasyndaǵy demalýshylarǵa 1020 jadynama taratyp, sýda shomylǵanda saq bolýǵa shaqyrdy. Sondaı-aq, órt qaýpi maýsymynyń bastalǵanyn eskere otyryp, qutqarýshylar aldyn alý reıdi barysynda turmysta jáne taýly-ormandy jerde órt qaýipsizdigin saqtaý jóninde 800-den astam jadynama taratty.
