Almaty qurylysynyń jańa erejeleri qala úshin nesimen mańyzdy
ALMATY. QazAqparat - Almaty qalalyq josparlaý jáne ýrbanıstıka basqarmasynyń basshysy Almashan Ahmedjanov bir aı buryn qabyldanǵan jańa qurylys erejelerin eske saldy. Ol jańartylǵan talaptardyń artyqshylyqtaryn aıtty jáne megapolıstiń damýyna qalaı áser etetinin túsindirdi, dep habarlaıdy QazAqparat.
Almashan Ahmedjanov jańa erejelerdi qabyldaý aldynda «Almaty qalasynyń erekshe mártebesi týraly», «Jergilikti memlekettik basqarý jáne ózin-ózi basqarý týraly», «Sáýlet, qala qurylysy jáne qurylys qyzmeti týraly»zańdarǵa ózgerister engizilgenin habarlady. «Almaty ákimi Baqytjan Saǵyntaevtyń tapsyrmasy boıynsha jasalǵan qujat boıynsha muqııat jumys júrgizildi. Almatylyqtardy alańdatyp otyrǵan barlyq jaǵdaılar eskerildi. Sonymen qatar qurylys kompanııalarynyń zańdy múddeleri de qarastyrylǵan», - dedi Almashan Ahmedjanov. Mysaly, qurylys salýdyń jańa erejelerin qabyldaǵannan keıin qurylys salýshylar jobalaý aldyndaǵy qujattamany alǵanǵa deıin qurylys jobalaryna qoǵamdyq talqylaý júrgizýge mindetti. Eskızdik jobany ázirleý kezinde qurylys salýshy:
- erekshe qurylystyq retteý aımaqtarynda (mysaly, ortalyqta) reglamentti saqtaýǵa;
- qabattylyqty saqtaýǵa;
- áleýmettik ınfraqurylymnyń (medıtsınalyq mekemeler, balabaqshalar men mektepter, polıtsııa pýnktteri) bolýyn eskerýge;
- halyqtyń tyǵyzdyǵyn esepteýge tıis.
Qalalyq josparlaý jáne ýrbanıstıka basqarmasynyń basshysy jańa erejeler boıynsha halyqtyń tyǵyzdyǵy:
- tarıhı ortalyqta gektaryna 300 adamnan
- qalǵan aýmaqtarda 440 adamnan aspaýy kerek dedi.
«Aýla aýmaqtarynyń salynýyna jol bermeý úshin bir adamǵa 10 sharshy metr aýlanyń normasy engizilgeni mańyzdy, onyń tórtten bir bóligi jasyl jelekterge bólinedi. Nelikten osy nemese basqa nysan erejelerge sáıkes kelmeıdi degen suraqtarǵa keletin bolsaq, men erejelerdiń barlyq talaptary tek jańa qurylysqa qoldanylatynyn eske salamyn, óıtkeni zańnyń keri kúshi joq», - dedi bas sáýletshi.
Memleket basshysynyń megapolısti damytý jónindegi tapsyrmasyna sáıkes, erejelerde Almatynyń qaıtalanbas sáýlettik kelbetin saqtaýǵa jáne árbir qala turǵynyna arnap otyrǵyzylǵan jasyl jelekterdiń sanyna erekshe oryn berilgen.
