Almaty quramasy qysqy spartakıadada jeńiske jetti
ASTANA. QazAqparat - Qysqy sport túrlerinen ótken IV respýblıkalyq spartakıadada Almaty quramasy jeńiske jetti, dep habarlaıdy QazAqparat.
Spartakıada - tórt jylda bir uıymdastyrylatyn jarys. Onyń basty maqsaty salaýatty ómir saltyn nasıhattap, Qazaqstannyń úzdik sportshylaryn anyqtaý jáne ulttyq quramanyń tolaǵaılaryn halyqaralyq jarystarǵa daıyndaý.
Bıylǵy jarys qysqy sporttyń 17 túrinen ótkizildi. Onyń 7-eýi Almatyda ótti. Olar: short-trek, kerlıng, qyzdar arasyndaǵy shaıbaly hokkeı, frıstaıl, shańǵy qossaıysy, shańǵymen tuǵyrdan sekirý, taý-shańǵy sporty.
Spartakıadanyń qorytyndysy boıynsha, Almaty quramasynyń sportshylary jalpy komandalyq esepte 571 upaı jınap, jeńiske jetse, Shyǵys Qazaqstan oblysynyń komandasy 558 upaımen ekinshi orynǵa jaıǵasty. Al qola júldeni 388 upaımen Astana qalasynyń sportshylary qanjyǵasyna baılady.
Aıta keter jaıt, bul spartakıada Qazaqstannyń 14 komandasynyń qatysýymen elimizdiń alty qalasy jáne oblystarynda ótkizilgen bolatyn.
Komandalar jınaǵan upaılary arqyly ret-retimen kelesi oryndarǵa jaıǵasty:
Almaty (357), Soltústik Qazaqstan (353), Aqmola (267), Qaraǵandy (205), Qostanaı (148), Aqtóbe (140), Pavlodar (122), Batys Qazaqstan (102), Jambyl (86), Ońtústik Qazaqstan (65) jáne Mańǵystaý (56) oblystary.
Esterińizge sala ketsek, aldynda ótken 3 spartakıadada Shyǵys Qazaqstan oblysynyń sportshylary qatarynan jeńimpaz atanǵan bolatyn. Osy joly almatylyqtardan tek 13 upaı utylyp, ekinshi oryn aldy.
