Almaty kúni: Alma festıvaliniń kókjıegi barynsha keńeımek
ALMATY. QazAqparat - Almaty qala kúnin toılaýǵa barynsha daıyndalýda. Bıylǵy alma festıvali Apple Fest óziniń kókjıegin barynsha keńeıtpek.
Bul týraly qalalyq Mádenıet basqarmasynyń baspasóz qyzmeti habarlady. Bıylǵy alma bazary qalanyń eki shetinde ashylmaq. Biri -Tuńǵysh Prezıdent saıabaǵynda, ekinshisi - Ortalyq mádenıet jáne demalys saıabaǵynda.
Bıylǵy jyly merekeniń qanatyn keńge jaıýyna baılanysty uıymdastyrýshylar bul sharaǵa almatylyqtar men qalaǵa kelýshiler sany burynǵydan da kóp bolady dep kútýde.
«Meıram qarsańynda qalada bir aı boıy 20-dan astam mádenı-qoǵamdyq sharalar ótiziledi. «ARTBATFEST 5» Halyqaralyq qazirgi zamanǵy óner festıvali aıasynda «Aqyl-parasat qalasy» atty taqyrypqa biriktirilgen kórmeler, master-klasstar, kóshelik teatrlandyrylǵan jáne bı qoıylymdary, jas sýretshiler kórmesi, TMD qazirgi óner kórmesi, «VanGoghAlive» mýltısensorlyq kórmesi («Vang Gogtyń Tirilgen keskindemeleri») ótkizilmek. Sondaı-aq, TMD elderiniń qýyrshaqtar teatry festıvali, «Almaty - meniń alǵashqy mahabbatym» mýzykalyq retro-festıvali, «Orkestrler sherýi» atty ashyq aspan astyndaǵy orkestrlik mýzyka festıvali, Omby memlekettik akademııalyq dramalyq teatrynyń gastrolderi, «GakkuTV» jańa mýzykalyq telekanaldyń ashylýyna oraı qazaq estrada juldyzdarynyń kontserti, «Evrazııa» halyqaralyq kınofestıvali, «Almatymdy jyrlaımyn» taqyryptyq sharalar tsıkli, «Muzzone 2014» Evrazııalyq mýzykalyq báıgesi uıymdastyrylady dep josparlanýda», - dedi qalalyq Mádenıet basqarmasynyń baspasóz hatshysy Rashıda Tilebaldıeva.
Ótken jyly Almaty kúnin toılaýǵa 120 myńnan astam turǵyn atsalysqan edi. Bıylǵy festıval budan kóp kelýshilerdi qarsy almaq.
