Almaty kóshelerine taǵy 7 myń kamera ornatylady
«Bıyl «Almatynyń erekshe mártebesi týraly» Zańdy iske asyrý úshin jeke beınebaqylaý júıelerin biryńǵaı dıspetcherlik pýnktke ıntegratsııalaý qaǵıdalary qabyldanatyn bolady. Árıne, ıesiniń kelisimimen. Qaýipsizdikti qamtamasyz etý úshin 2025 jylǵa deıin beınetaldaýdyń «aqyldy» júıeleriniń barlyq múmkindikterin paıdalana otyryp, beınebaqylaýmen qamtylmaǵan obektilerde 7000 beınebaqylaý kamerasy ornatylady»,- dedi Almaty ákiminiń orynbasary Asqar Amrın.
Aıtýynsha, Almatyda quqyq buzýshylyqtardyń úshten biri qoǵamdyq oryndar men kóshelerde jasalady.
«2024 jylǵa deıin adamdar kóp jınalatyn jerlerde «SOS «dabyl túımesi» shuǵyl aýdıo jáne beıne shaqyrý júıesi ornatylatyn bolady. Jalpy, 2030 jylǵa deıin kósheler, joldar men aýlalar jańa jaryqtandyrý jelilerin salý, jaryq núktelerin ornatý jáne tozǵan shamdardy jańa LED shamdarǵa aýystyrý arqyly sapaly jaryqpen tolyq qamtamasyz etiledi»,-dedi ol.
Sonymen qatar, ol Almatynyń barlyq aýdandarynda 2023 jyly «polıtsııanyń servıstik ortalyqtarynyń» alǵashqy 8 pýnkti ashylatynyn atap ótti.
«Ortalyqtarda tek polıtseıler ǵana emes, olarda psıhologtar, medıatorlar kabınetteri, balalar bólmeleri jáne taǵy basqasy bolady. Qysqa áńgimeler arqyly júzege asyrylatyn ortalyqtardaǵy polıtsııamen oń baılanys turǵyndardyń polıtsııaǵa degen kózqarasyn, sonyń ishinde quqyqtyq tártipti saqtaýǵa jáne yntymaqtastyqqa daıyndyǵyn edáýir jaqsartady»,-deıdi ol.
Al, 2030 jylǵa qaraı 30 ýchaskelik polıtsııa pýnktin ashý josparda tur.
«Osylaısha, atalǵan sharalardyń arqasynda qylmys sanyn 2025 jyly 10 myń turǵynǵa shaqqanda 165-ke deıin jáne 2030 jylǵa qaraı 10 myń turǵynǵa shaqqanda 150-ge deıin azaıtýǵa bolady. Halyqtyń polıtsııa organdaryna degen senim deńgeıin 2025 jyly 50% deıin, 2030 jyly 80% deıin arttyrý kózdelgen. Jeke, múliktik jáne qoǵamdyq qaýipsizdik sezimin arttyrý 2025 jyly 80%, 2030 jyly 88% jetetin bolady»,- dep tolyqtyrdy spıker.