Almaty kóshelerine qaraǵan, tsertsıs jáne emen aǵashtary otyrǵyzylyp jatyr
ALMATY. QazAqparat - Almaty turǵyndary bir kúnniń ishinde 7 myńnan astam aǵash otyrǵyzdy, dep habarlaıdy QazAqparat tilshisi.
«Jasyl Meken» jalpyqalalyq aktsııasyna 120 myńnan astam qala turǵyny, sonyń ishinde qoǵamdyq birlestik ókilderi, memlekettik qyzmetshiler men jastar qatysty.
«Otyrǵyzylǵan aǵashtar arasynda shaǵan, qaıyń, jóke, emen, úıeńki, qaraǵan, shyrsha jáne taǵy basqalar boldy. Bul aǵashtardyń basym bóligi taýly aımaqtarǵa jaqsy beıimdeledi jáne kútimdi asa qajet etpeıdi. Eń bastysy - qala atmosferasyn ottegimen qamtamasyz etedi. Otyrǵyzylǵan aǵashtar kóshelerdiń sánin keltirip tur», - dep atap ótti Almaty ákimdiginiń qoǵammen baılanys qyzmetiniń jetekshisi Tımýr Bazarbaev.
Aǵash otyrǵyzýmen qatar, kóshe, aýla aýmaqtary, qoǵamdyq oryndar, aryq jelileri, ózen arnalary tazartyldy. Jınalǵan qoqysty shyǵarý úshin 900 arnaıy tehnıka jumyldyryldy.
Kógaldandyrý naýqany aıasynda Dıvaev kóshesinen Odesskaıa kóshesine deıin 557 aǵash, sonyń ishinde 100 túp emen, 175 jóke, 100 tsertsıs, 75 sánaǵash, 25 qaıyń jáne 82 shyrsha otyrǵyzyldy.
Budan buryn habarlanǵandaı, Almatyda osy kóktemde 12 myńnan astam aǵash otyrǵyzý josparlanyp otyr.
Avtor: Maııa Teńizbaeva
