Almaty kóshelerinde qar kúreý jumystary qalaı júrgiziledi
ALMATY. QazAqparat - Qalanyń kommýnaldyq qyzmetteri kúsheıtilgen rejımde jumys istep jatyr. Bul týraly BAQ ókilderine Almaty qalalyq Kommýnaldyq ınfraqurylymdy damytý basqarmasynan málim etti, dep habarlaıdy QazAqparat tilshisi.
Kommýnaldyq ınfraqurylymdy damytý basqarmasy kóriktendirý bóliminiń basshysy Aıdyn Qalabaevtyń sózinshe, óndiristik bazalarda táýlik boıǵy kezekshilik uıymdastyrylǵan.
«Sınoptıkterdiń boljamynsha, aldaǵy eki táýlikte qalaǵa qalyń qar túsip, aıaz bolady. Osyǵan oraı kommýnaldyq qyzmetter kúsheıtilgen rejımge kóshti. Myńǵa jýyq arnaıy tehnıka men 1400 jol jumysshysy jumyldyrylady»,- deıdi ol.
Basqarma mamany Aleksandr Sergeevtiń aıtýynsha, qar bastalmaı turyp aldymen, kóshelerge qum qospasy shashylady. Sodan keıin ǵana tehnıka qar kúreýge shyǵady.
«Eń aldymen, magıstrldi kósheler tazartylady. Olar bizde kóp emes. Atap aıtar bolsam – Ál- Farabı, Abaı, Sátbaev, Rysqulov jáne Tóle bı. Sodan keıin basqa kóshelerge kirisedi. Jalpy, kommýnaldyq qyzmetter arnaıy keste boıynsha jumys isteıdi», - dedi Aleksandr Sergeev.
Sonymen qatar ol kóktaıǵaqqa baılanysty júrgizýshilerge jyldamdyqty azaıtyp, kólik arasyndaǵy arqashyqtyqty ulǵaıtýǵa keńes berdi.
Buǵan deıin Almatyda qalyń qar jaýyp, -25 gradýs aıaz bolatyny týraly jazǵan bolatynbyz.
