Almaty kóshelerin 2 myńǵa jýyq áskerı qyzmetshi zararsyzdandyrýda
ALMATY. QazAqparat – Almatyda QR Qarýly Kúshteriniń áskerı qyzmetshileri qala kósheleri men ǵımarattaryn, qoǵamdyq oryndardy dezınfektsııalaý jumystaryn júrgizip jatyr, dep habarlaıdy QazAqparat tilshisi.
Qala boıynsha zararsyzdandyrý jumystaryna Almaty garnızonynyń 2 myńǵa jýyq áskerı qyzmetshisi jumyldyrylǵan.
Arnaıy bólimshe qyzmetkerleri Almatydaǵy 248 nysan: mektep, balabaqsha, balalar alańy, emhanalar, termınaldar aımaǵyn zararsyzdandyrdy.
Sonymen qatar QR Qarýly Kúshteriniń arnaıy bólimsheleri avtobýs aıaldamalaryn, trotýarlardy, avtokólik turaqtaryn dezınfektsııalaıtyn bolady.
Ol úshin jeke quram qajetti arnaıy tehnıkamen, degazatsııalyq kostıýmdermen, zararsyzdandyrý suıyqtyqtarymen qamtylǵan.
«Bizdiń basty maqsatymyz – ınfektsııanyń taralýyn toqtatý. Koronavırýstyń jańa túri aýada 3 saǵattaı, zattardyń ústinde 48 saǵat turady degen maǵlumat bar, aýa arqyly juqtyrý qaýpi joǵary. Sondyqtan, kósheler men qoǵamdyq oryndardy dezınfektsııalaý – jumystyń asa mańyzdy baǵyty. Búginde jalpy kólemi 1 mln 392 sharshy metr bolatyn 81 nysan zararsyzdandyryldy. Oǵan 500 adam 24 tehnıka jumyldyryldy», - dedi maıor Almas Qasymhanov.
Aıta ketý kerek, karantın rejımin saqtaý aıasynda 21 blokbekette 230 áskerı qyzmetshi qyzmet etip jatyr.
Osy ýaqytta Qazaqstanda koronavırýs juqtyrǵandardyń sany97-ge jetti.
