Almaty kósheleri muz aıdynyna aınaldy: Qalada birneshe jol apaty boldy
ALMATY. QazAqparat - Almaty joldary qalyń tuman men jaýyn shashyn saldarynan muz aıdynyna aınaldy, dep habarlaıdy QazAqparat tilshisi.
Turǵyndar áleýmettik jelide kóktaıǵaq kesirinen bolǵan jol apatynyń sýreti men vıdeosyn tarata bastady.
Instagram jelisindegi kris.p.official paraqshasynda Abaı men Saın qıylysyndaǵy jol apatynyń vıdeosy tarady.
«Jolaýshylarǵa abaı bolýdy eskertemiz. Qalada qatty kóktaıǵaq. Qajettilik bolmasa shyqpańyzdar. Jol apaty kóp bolyp tur» delingen jazbada.
Kris_p_kz pablıginde basqa da jol apattarynyń sýreti jarııalandy.
«Almaty. Kóktaıǵaq. Úlken Almaty kanaly, Shyǵys aınalma joly, Móńke bı, ál-Farabı... barlyq jerde jol apaty bop jatyr» delingen jazbada.
Sonymen qatar, Súıinbaı kóshesinde eki adamdy kólik qaǵyp ketti .
Qazgıdromettiń boljamy boıynsha, 17 naýryzǵa deıin kún jaýyn-shashyndy bolady dep kútilýde.
Erteń, 14 naýryzda kúndiz aýa raıy +2 gradýs bolyp, nóserli jaýyn-shashyn bolady. Qalǵan kúnderi de aýa raıy jaýyn-shashyndy bolmaq.
Túngi ýaqytta aýa temperatýrasy -7 gradýsqa deıin tómendeýi múmkin.
Qazirgi ýaqytta aýdandyq ákimdikterde sý basý men kóktaıǵaqtyń aldyn alý úshin táýliktik kezekshilik uıymdastyryldy.
«Kommýnaldyq qyzmetterdiń qar tazalaý jumystaryn jedel ári sapaly júrgizý úshin, avtokólik júrgizýshilerinen kólik qozǵalysyn shekteýdi jáne kólikterin jol jıekterine qoımaýlaryn suraımyz. Qar tazalaýǵa kedergi keltiretin kólikterdi evakýatorlardyń alyp ketetinin eskertemiz. Eger kólikpen júrýdiń qajettiligi týyndasa, júrgizýshilerdi jyldamdyqty azaıtyp, avtomobılder arasynda qashyqtyqty ulǵaıtýǵa jáne kenetten manevr jasamaýǵa shaqyramyz» dep habarlady Qazgıdromet.
