Almaty koronavırýstyń taralýynyń sharyqtaý sheginen ótti – Bekshın
ALMATY. QazAqparat - Almatyda koronavırýs juqtyrǵandardyń 92% indet anyqtalǵan sátte oqshaýlandyryldy jáne olar syrtqy ortamen baılanysta bolmaǵan. Bul týraly Almaty qalasynyń memlekettik bas sanıtarlyq dárigeri Jandarbek Bekshın málim etti, dep habarlaıdy QazAqparat tilshisi.
Onyń aıtýynsha, búginde qala boıynsha COVID-19-dyń rastalǵan 1578 jaǵdaıy tirkelgen. 8 mamyrda koronavırýs ınfektsııasyn juqtyrýdyń birden 108 jaǵdaıy anyqtaldy. Olardyń barlyǵy naýqastarmen baılanysta bolýyna baılanysty karantınde jatqandar.
«92% naýqastarmen baılanysta bolǵandardyń arasynan anyqtalǵan. Sebebi, mamandar vırýs juqtyrǵandarmen qarym-qatynasta bolǵandardy jedel, der kezinde baqylaýǵa alyp otyr. Naýqastardyń 7% skrınıngten ótken kezde, 1% medıtsınalyq kómekke júginý barysynda josparly emdeýge jatqyzý aldynda anyqtalǵan. Qazirgi tańda qalamyzda profılaktıkalyq skrınıng ádisi engizilgen. Bul – koronavırýs ınfektsııasyn jedel ári sapaly, dál anyqtaıtyn zamanaýı ádis. Mundaı ádis engizilgeli beri, mysaly, ótken sáýir aıynda koronavırýsty juqtyrý deńgeıi táýligine 6% aspaǵandyqtan, qala ekonomıkasyn kezeń-kezeńimen qalpyna keltirý strategııasy júzege asyryla bastady. Karantınnen qaýipsiz shyǵý úshin Almatyda ınfektsııanyń jasyryn oshaqtaryn belsendi anyqtaý maqsatynda jappaı testileý júrgizilýde», - dedi J.Bekshın.
Atap ótilgendeı, profılaktıkalyq skrınıng ádisiniń bergen taǵy bir nátıjesi, 75% naýqastyń boıyndaǵy qaterli ınfektsııa sımptomsyz, óte jeńil kezeńinde anyqtaldy.
«Bul, árıne, syrqattyń asqynýynyń aldyn alady jáne tez saýyǵyp ketýine múmkindik mol. Ekinshiden, bul skrınıng bizge jasyryn indet oshaqtaryn da jedel anyqtaýǵa kómektesip jatyr.
Bir kúnde anyqtalǵan 108 naýqastyń bári karantınde otyrǵan adamdarmen baılanysta bolǵandar. ıAǵnı, olar syrtqy ortadan, úıinen nemese jumys ornynan juqtyryp kelmegender. Biz ol deńgeıge jetkizbedik», – dedi qalanyń bas sanıtarlyq dárigeri.
Sáýir aıynda sanıtarlyq-epıdemıologııalyq baqylaý sharalaryn kúsheıtý jáne testileý kontıngentin keńeıtý nátıjesinde juqtyrý oshaqtary anyqtaldy. Baılanysta bolǵan barlyq adam dereý oqshaýlandy. Búgingi kúni juqtyrý jaǵdaılary osy toptaǵy oqshaýlandyrylǵan adamdardyń arasyndaǵy anyqtalyp jatyr. Demek, ınfektsııanyń odan ári taralý joly kesildi.
Qalanyń bas sanıtarlyq dárigeriniń sózinshe, PTR-dıagnostıkanyń aýqymy, ıaǵnı kontıngenti keńeıtilgen. Bastapqy kezeńde PTR-test júrgizetin 2 zerthana bolǵan. Al qazir olardyń sany 6-ǵa jetti. Nátıjesinde ózge aımaqtarmen salystyrǵanda almatylyqtardyń PTsR-testten ótý kórsetkishi, ıaǵnı qamtylý deńgeıi respýblıka boıynsha alǵashqy orynda tur.
Almatyda osy ýaqytqa deıin jalpy 85 myńǵa jýyq adam koronavırýs ınfektsııasyn anyqtaý testinen ótti, onyń ishinde 61-myńy PTR ádisimen, al 24 myńy eksperss-test boıynsha tapsyrǵan.
«PTR-dıagnostıka qazirgideı syn shaqta bizge eń sapaly ári jedel, dál nátıje berip otyrǵanyn basa aıta keteıin. Bul indet qalada eń alǵash 13 naýryzda tirkelgeni belgili. Al qazir Almaty aýrýshańdyq shyńynan ótti. Úıdegi indet oshaqtarynyń sany jáne turǵyndar arasyndaǵy naýqastar kórsetkishi azaıǵan. Bul – profılaktıkalyq skrınıng ádisiniń jemisi. Budan ári de qaýipti indetti juqtyrǵandar sanyn osylaı der shaǵynda anyqtap, oqshaýlaý jáne olarmen tyǵyz baılanysta bolǵan adamdarmen jumys isteý ádisin ustanamyz. Profılaktıkalyq zamanaýı bul ádis ınfektsııanyń syrtqy ortaǵa taralyp ketpeýiniń aldyn alady jáne vırýstyń alǵashy satysynda-aq anyqtalady. Búgingi tańda osyndaı jumystardyń nátıjesinde naýqastar sanynyń kúndelikti ósý qarqyny 27%n 5% azaıǵan. ıAǵnı, epıdemıologııalyq ahýal turaqtalyp keledi. Bizdiń oıymyzsha bul kórsetkish te bara-bara odan ári tómendeıdi», – dedi Jandarbek Bekshın.
