«Almaty - Qorǵas» jolynyń ýchaskesi jyl sońyna deıin aqyly bolady
ALMATY. QazAqparat - Almatyda Batys Eýropa- Batys Qytaı kólik dáliziniń «Almaty Qorǵas» bóligindegi ıntellektýaldy kólik júıesin aqyly etý boıynsha qoǵamdyq tyńdaý ótip jatyr, dep habarlaıdy QazAqparat tilshisi.
Jıyn barysynda mamandar jolda qashan aqyly rejim engiziletinin aıtty.
«Biz úshinshi toqsanda qyrkúıekte testilik rejimde jumys jasaı bastaımyz. Alǵashqy úsh aıda kólikter tirkelgenmen, aqy tólenbeıdi. Jeltoqsan nemese qańtar aıynda aqyly rejim engiziledi», - dedi «QazAvtojol» ulttyq kompanııasynyń baspasóz hatshysy Baýyrjan Serikbaev.
Onyń aıtýynsha, tarıf mólsherin Úkimet bekitedi. Shamamen 1 shaqyrym jol úshin 1 teńge tólenedi.
«Búginde 1 shaqyrym joldy júrip ótý quny 1 teńge. Bul tarıf áli ózgergen joq», - dedi ol.
Ulttyq kompanııanyń ókili Ernar Tólegenov jol boıynda eki tóleý pýnkti ornalastyrylatynyn aıtty.
Eki pýnkt arasynda kameralarmen jabdyqtalǵan 6 arka, 6 meteostansa ornatylady.
Sonymen qatar, «Almaty-Qapshagaı» jol ýchaskesinde de aqyly rejim engizilmek.
Jol aqysyn tólem pýnktterinde, Qiwi termınaldarynda, kassa 24 júıesinde, ınternet arqyly (payway.kz); bank kartasymen, jeke shot arqyly (zańdy tulǵalarǵa) tóleýge bolady.
Eger tulǵalar jol aqysyn tólemegen jaǵdaıda 7 kún ishinde tóleý týraly habarlama jiberiledi. Oǵan jaýap bolmaǵan jaǵdaıda jeke tulǵalarǵa - 5 AEK, zańdy tulǵalarǵa 10 AEK kóleminde aıyppul salynady.
Aqyly jol bóligin paıdalanǵany úshin aqy tóleýden qyzmet babyndaǵy arnaıy kólikter, aqyly jolǵa jaqyn aýyldardy baılanystyratyn jolaýshylar avtobýstary, belgilengen ákimshilik terrıtorııalydyq birlikte tirkelgen, osy aýdanda turatyn jeke jáne zańdy tulǵalardyń kólikteri bosatylady.
