«Almaty-Qorǵas» jol ýchaskesinde jumystar jandana bastady
ASTANA. 30 qazan. QazAqparat - «Almaty-Qorǵas» avtomobıl jolynda merdigerlik uıymdar daıyndyq jumystary men jol-qurylys tehnıkasyn jumyldyra bastady. Atap aıtqanda, atalǵan ýchaskede qurylys alańdaryn, vahtalyq qalashyqtardy jáne topyraq karerlerin jaıǵastyrý jumystary júrgizilýde. Al ýchaskedegi basty jumystar kóktemge qaraı bastalady. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Mınıstrliktiń Avtomobıl joldary komıtetiniń tóraǵasy Zamır Saǵynovtyń aıtýynsha, joba iske asyrý merziminiń kestesine sáıkes júrgizilýde. «Barlyq jol 8 lotqa bólinip, tórt merdiger aıqyndalǵan. 2015 jyly «Almaty-Qorǵas» tórt jolaqty jolynyń qurylysy aıaqtalyp, ýchaske birinshi tehnıkalyq sanatqa ótedi», - deıdi ol.
Jalpy uzyndyǵy 304 shaqyrymdy quraıtyn «Almaty-Qorǵas» avtomobıl joly «Batys Eýropa - Batys Qytaı» halyqaralyq tranzıttik dáliziniń bir bóligi ekendigi belgili. Dálizdiń Qazaqstan aýmaǵy arqyly ótetin jalpy uzyndyǵy 2787 shaqyrym, onyń qaıta salynýǵa tıisti bóligi 2452 shaqyrymdy quraıdy. 2011 jyly dálizdiń 215 shaqyrymy, al 2012 jyly 700 shaqyrymy paıdalanýǵa berilgen bolatyn. 2013 jyldyń aıaǵyna deıin 806 shaqyrym jol paıdalanýǵa beriledi. Munyń syrtynda «Batys Eýropa - Batys Qytaı» jobasy aıasynda 479 sý ótkizetin qubyr, 56 kópir jáne 13 jol ótpesi salynady jáne qaıta jańǵyrtylady. Kólik dáliziniń jalpy qurylysyn 2015 jyly tolyq aıaqtaý josparlanýda.
