Almaty-Qorǵas tasjolynda 17 kólik soqtyǵysty: Polıtsııa júrgizýshilerge qatań eskertý jasady
«Almaty oblystyq Polıtsııa departamenti 25 jeltoqsanda saǵat 10-00 shamasynda «Almaty-Qorǵas» avtojolynyń 134-shaqyrymynda joldy qalyń tuman basýyna baılanysty jolda 17 avtokóliktiń soqtyǵysqanyn habarlady. Jol apaty kezinde 5 adam zardap shegip, olar Shelek aýylynyń aýmaqtyq aýrýhanasyna jetkizildi»,- delingen Almaty oblysy PD baspasóz qyzmetiniń resmı habarlamasynda.
Vedomstvonyń aqparatyna sáıkes, oqıǵa ornynda patrýldik polıtseıler qyzmet atqarýda. Atalǵan avtojoldyń 84 shaqyrymynan bastap, 136 shaqyrymyna deıin jabyldy.
«Qurmetti júrgizýshiler, qozǵalys kezinde óte muqııat bolýlaryńyzdy jáne qaýipsizdik talaptaryn qatań saqtaýlaryńyzdy suraımyz!. Jyldamdyq tártibin buzbaý jáne araqashyqtyqty saqtap, jol erejesin esten shyǵarmaý qajettiligin eske salamyz!»,- dep tolyqtyrdy vedomstvonyń baspasóz qyzmeti.