Almaty-Qorǵas tas jolyndaǵy kólik apatynan eki adam qaza tapty
TALDYQORǴAN. QazAqparat - Búgin Almaty-Qorǵas tas jolynda kólik apaty oryn aldy. Apat saldarynan kóliktegi eki áıel adam oqıǵa ornynda jan tapsyrǵan, al kólik júrgizýshisi aýrýhanaǵa jetkizilgen, dep habarlaıdy QazAqparat tilshisi.
Belgili bolǵandaı, búgin tańǵy 6:00 shamasynda Toyota Avensis avtokóligi keden beketindegi soqqyǵa qarsy qondyrǵyǵa soǵylǵan. Kólik apatynan jalǵyz ózi aman qalǵan kólik júrgizýshisi túrli dene jaraqatymen jaqyn mańdaǵy aýrýhanaǵa jetkizilgen. Oqıǵany oblystyq Polıtsııa departamenti rastady.
«Búgin tańerteń Almaty-Qorǵas tas jolynda kólik apaty bolǵany ras. Kóliktegi eki jolaýshy áıel oqıǵa ornynda qaıtys boldy. Júrgizýshi aýrýhanaǵa jetkizildi. Atalǵan fakti boıynsha QR QK 345-baby boıynsha sot aldy tergeý bastaldy»,- dedi Almaty oblystyq Polıtsııa departamenti baspasóz qyzmetiniń ókili Kóbeıhan Nurahmetov.
Sondaı-aq, vedomstvo ókili atalǵan kólik apaty oblystyq anyqtaý basqarmasynyń qaramaǵynda ekenin jetkizdi.
