Almaty - Qorǵas tas jolynda jylqynyń kesirinen er adam mert boldy
ALMATY. QazAqparat–Almaty-Qorǵas tas jolynda avtokólik jolǵa shyǵyp ketken jylqyny bar jyldamdyqpen qaǵyp ketti, bir adam kóz jumdy, dep habarlaıdy QazAqparat tilshisi.
Qaıǵyly oqıǵa búgin tańǵy saǵat 4-te Almaty-Qorǵas jolynyń 94 shaqyrymynda oryn aldy. Jolaýshylary bar avtokólik batysqa qaraı (Batys Eýropa-Batys Qytaı) baǵyt alǵan. BMW-528 markasyndaǵy avtokóliktiń rýlinde 22 jastaǵy júrgizýshi bolǵan.
«Qatty jyldamdyqpen kele jatqan avtokóliktiń júrgizýshisi qarańǵyda jol boıyna shyqqan jylqyny baıqamaǵan. Ókinishke oraı, avtokólikte bolǵan 1950 jyly týǵan er adam Esik qalasynyń ortalyq aýrýhanasynda kóz jumdy. Joba boıynsha atalmysh ýchaskede jaryqtandyrý men úı janýarlarynyń jolǵa shyqpaýyna arnalǵan qorshaýlar qarastyrylmaǵan. Eki baǵyttaǵy jol qozǵalysyn metall qorshaýlar bólip turady»,- dedi «QazAvtoJol» UK» AQ baspasóz qyzmetiniń basshysy Marjan Ordabaı.
Qazir «QazAvtoJol» UK» AQ qyzmetkerleri jergilikti polıtsııa qyzmetkerlerimen birlesip, jol-kólik oqıǵasynyń sebepshisi bolǵan úı janýarynyń ıesin izdestirýde.
