Almaty kórermenderi úsh metrlik qoltyraýynnyń ónerin tamashalaıdy
ALMATY. QazAqparat - Almatyǵa «Óte jaqsy tsırk» baǵdarlamasymen máskeýlik tsırk keldi. Baǵdarlamanyń basty ereksheligi kórermender Reseı tsırk óneriniń jaryq juldyzdarynyń ónerin tamashalaıtyn bolady. 1 mamyrda óner ujymynyń qaıyrymdylyq kórsetilimi bastalady.
Atap aıtqanda, Anton men Natalıa Papazovtar arbaletpen qyzdardyń tóbesindegi shardy atyp, mergendikterin synaıdy.
Belgili áýe akrobattary Nadejda Krasovskaıa men Natalıa Vasıleva 8 metrlik bıiktikten saqına nómirin oryndaıdy.
Sondaı-aq, Nadejda Krasovskaıanyń úıretilgen maımyldary, Sergeı Prıchınıchanyń ıtteri men aıýlary qosylyp óner kórsetedi.
Almaty kórermenderi alǵash ret qoltyraýyndardyń ónerine kýá bolady. Uzyndyǵy 3 metr 20 sm bolatyn mıssısıpı allıgatory Marta eń kúrdeli trıýkter jasaıdy.
Ony qojaıyny týǵan sátinen bastap baǵyp keledi. Allıgator aptasyna 10 keli et jeıdi.
«Olardy mahabbatpen baǵýǵa tyrysamyn. Zulymdyqqa zulymdyqpen jaýap beredi. Abaı bolǵan jón. Negizi olar dressırovkaǵa kónbeıdi. Olar qojaıynǵa úırenip alady. Jyrtqyshtyq túısigi oıanbas úshin qoıylym bolar aldynda balapan, balyq, taýyq sııaqty jany bar janýarlardy bermeýge tyrysamyn. Men óz qoltyraýyndarymdy erkindikke jibersem, olar 1 táýlik te ómir súre almas edi», - dedi Aleksandr Orlov.
«Búgin bizdiń qazaq memlekettik tsırkine arnaıy Máskeýden jańa baǵdarlamamen qoıylym kelip jatyr. 30 sáýir men 29 mamyr aralyǵynda óz ónerin Almaty turǵyndaryna pash etedi. Kúndelikti kezdese bermeıtin janýarlar, úlken sheberler óz ónerlerin tartý etedi. Kópultty elden turatyn ónerpazdar óner kórsetedi. Belarýs, Ýkraına, Reseıden aty elge máshhúr tsırk ártisteri óner kórsetedi. Kelińizder, tamashalańyzdar», - dedi «Qazaq memlekettik tsırki» MKK dırektory Baqyt Bókebaev.
