«Almaty» qonaq úıiniń tarıhı kelbeti qaıta qalpyna keltiriledi
ALMATY. QazAqparat - Búgin Almatyda jýrnalıstermen bolǵan kezdesýde Astana Group prezıdenti Nurlan Smaǵulov júzege asyrylyp jatqan jobalar jaıynda áńgimeledi. Solardyń biri -keńes zamanynda salynǵan «Almaty» qonaq úıin qaıta jańartý.
«Bizdiń kompanııa bul qonaq úıdi 2006 jyly ashyq bássaýdada satyp alǵan bolatynbyz. Alǵashynda biz ony súrip tastap, ornyna zamanaýı úlgide jańa qonaq úı salýǵa nıettenip edik. Biraq, keıin onyń qala arhıtektýrasyna jaqsy úılesetin ǵımarat ekendigine kóz jetkizip, qaıta jańartýdy uıǵardyq. Bul úshin Ulybrıtanııadan mamandar shaqyryldy. Olar bul qonaq úıdiń qaladaǵy eń ádemi ǵımarattardyń biri ekendigin aıtty», - dedi N. Smaǵulov.
Ol sonymen qatar, álemde belgili qonaq úı jelileriniń quramyna kirmeıtin, biraq týrıster arasynda óte tanymal jekelegen qonaq úılerdiń bar ekendigin jetkizdi.
«Olardyń basqa qonaq úılerge uqsamaıtyn ózindik bir erekshelikteri bolady. Sondyqtan, biz bul qonaq úıdiń tarıhı ataýyn qaldyrdyq. Endi syrtqy jaǵy men ishki kórinisterine jóndeý júrgiziledi, ınjenerlik jelileri aýystyrylady. Al nómirler qazaqsha, slavıandyq jáne eýropalyq stılde jabdyqtalady. Bólmeler úlken emes - 12-16 sharshy metrden. Biz olardy qaz-qalpynda qaldyrdyq. Qonaq úı - úsh juldyzdy bolady. Onda spa nemese basseınder jasalmaıdy. Al bólmeler ortasha baǵalyq segmentte bolady», - dedi Astana Group prezıdenti.
Sondaı-aq, N. Smaǵulov qazir ǵımarattyń syrty alıýkobondpen qaptalǵandyǵyn, al jańartý jumystarynyń arqasynda bastapqy qalpyna keltiriletindigin aıtty.
«Qonaq úıge jańa, zamanaýı jaryqtandyrý júıesi ornatylady. Almatylyqtar bul ózgeristerdi laıyqty baǵalaıdy dep oılaımyn», - dedi ol.
Qonaq úıdi jańartý jobasy basqa da jobalarmen birge ústimizdegi jyldyń sońyna deıin júzege asyrylady. Olardyń qatarynda «Mega Alma-Ata» saýda oıyn-saýyq ortalyǵynyń aldyna salynatyn Qazaqstan boıynsha eń bıik kózben sholý dońǵalaǵy da bar.
Aıta ketelik, «Almaty» qonaq úıi 1967 jyly salynǵan. Qabanbaı kóshesiniń boıynda, Abaı atyndaǵy memlekettik akademııalyq opera jáne balet teatrynyń qarama-qarsy tusynda ornalasqan.
