Almaty kompanııalary «Qarashyǵanaqqa» 15 mln dollarlyq jabdyqty jetkizbek

ALMATY. QazAqparat - «Qarashyǵanaq» pen Almaty kompanııalary ózara kelisimge keldi. Óndirýshiler ken ornyna quny 15 mln AQSh dollary bolatyn jabdyqty jetkizbek, dep habarlaıdy QazAqparat tilshisi.

«Qarashyǵanaq Petrolıým Opereıtıng B. V.» men birqatar almatylyq kompanııa ókilderi Almatydaǵy 5 ınvestıtsııalyq forým barysynda qujatqa qol qoıdy.

«Kompanııa jergilikti jetkizýshilermen jumysty jaqsartýda. Birneshe jyl buryn jergilikti qamtýdy damyta bastadyq. 4 000 jumyskerdiń 90 paıyzy qazaqstandyqtar. Qarashyǵanaq jobasy tıimdi júzege asýy úshin úlken ári joǵary tehnologııalyq qural-jabdyq AQSh-tan ákelinetin. Sońǵy ýaqytta memlekettik qoldaýdyń arqasynda jergilikti ónimderdiń sapasy jaqsara bastady. Jergilikti óndirýshilermen jumys jasaý bizge tıimdi. Sebebi, jolǵa ketetin shyǵyn az», - dedi «Qarashyǵanaq Petrolıým Opereıtıng B. V.» bas dırektory Rınato Marolı.

Qarashyǵanaq munaı-gaz kondensaty ken ornyna almatylyqtar elektrstansany, órt qaýipsizdigi kıimderin, Batys Qazaqstan zaýyttarynyń sertıfıkatsııasyn jetkizetin bolady.