Almaty kolledjderinde oqý jabdyqtary jańarady
ALMATY. QazAqparat - «Almaty mektepteri postkovıdtik kezeńde: Bilim sapasy, balalardyń densaýlyǵy jáne otbasynyń róli» atty onlaın forým barysynda megapolıs ákimi Baqytjan Saǵyntaev tehnıkalyq jáne kásiptik bilim berý mekemelerin damytý sharalary týraly aıtty, dep habarlaıdy QazAqparat tilshisi.
Jańa oqý jylynda 82 kolledjdiń 68 myńnan astam stýdentteri dástúrli bilim berý formatyna oralady.Tehnıkalyq jáne kásiptik bilim berý uıymdarynda mektepterdikine uqsas sanıtarlyq-epıdemıologııalyq qaýipsizdikti qamtamasyz etýdiń profılaktıkalyq sharalary qabyldandy, barlyq kolledjder, stýdentter turatyn jataqhanalar Ashyq jobasyna qosylǵan.
Bıyl «Jas maman» jobasy aıasynda TjKB uıymdardy zamanaýı qurylǵylarmen materıaldyq-tehnıkalyq jabdyqtaý jalǵasatyn bolady.
«Eger ótken oqý jylynda 8 kolledj zamanaýı qondyrǵylarmen jabdyqtalǵan bolsa, bıyl biz taǵy 10 kolledjdi qamtamasyz etemiz. Ótken jylǵy jumys tájirıbesine sáıkes jańa zerthanalar, sheberhanalar uıymdastyrylady, stýdenter bularda praktıkadan ótip, alǵan bilimderin is júzinde paıdalanatyn bolady», – dedi Bayqtjan Saǵyntaev.
Qala ákimi Bilim basqarmasyna mektepterde kásiptik baǵdar berý jumysyn jaqsartýdy, bul máseleni sheshýge jumys berýshi kásiporyndardy keńinen tartýdy, kolledjderdegi Quzyrettilik ortalyqtarynyń jumystaryn jandandyrýdy tapsyrdy.
