Almaty kólik prokýratýrasy 1,2 mlrd teńgeni memleket qazynasyna qaıtardy

ALMATY. QazAqparat - Almaty kólik prokýratýrasy 1,2 mlrd teńgeni memleket qazynasyna qaıtardy. Semırechensk kólik prokýratýrasy 2016 jylǵy jasalǵan jumys týraly QazAqparat tilshisine baıandap berdi.

«Atap aıtqanda, áleýmettik-ekonomıkalyq salada 306 zańbuzýshylyq anyqtaldy. 199 tulǵa jaýapkershilikke tartylyp, 1055 azamattyń quqyǵy qorǵaldy. Sotqa deıingi 10 tergeý isi qozǵaldy, 18 aryz qanaǵattandyryldy. Bıznestiń «tynysyn taryltqan» 12 laýazymdy tulǵa jaýapqa tartylyp, 25 sýbektiniń quqyǵy qorǵaldy», - delingen habarlamada.

Onyń ishinde temir jol qozǵalysynda 38 zańbuzýshylyq tirkelip, 50 adam jaýapqa tartyldy. 7 jolaýshy vagonynyń jumysy toqtatyldy.

Prokýratýra jazǵan aktilerdiń nátıjesinde 1 mlrd 220 mln teńge kólemindegi qarjy memleket qazynasyna qaıtaryldy.