Almaty qoqys suryptaý kesheni testileý rejıminde iske qosyldy
ALMATY. QazAqparat - Qoqys suryptaý zaýyty ázirshe tehnıkalyq tártipte jumysyn bastady, dep habarlaıdy QazAqparat tilshisi.
Jalpy quny 5,4 mlrd teńge bolatyn bul joba jeke ınvestıtsııalar esbinen júzege asty.
«Keshenniń óndiristik qýatyna kelsek, jylyna 550 myń tonna qoqysty quraıdy. Zaýyt jobasynda Almatynyń qatqyl turmystyq qaldyqtarynyń jalpy kólemi jáne aldaǵy bes jyldaǵy kólemi de eskerilgen. Qazir megapolıste jylyna 600 myń tonnaǵa jýyq qoqys jınalady. Biz TQQ suryptaý kezinde qalany tolyq qamtıtyn bolamyz», - deıdi ınvestıtsııa kompanııasynyń dırektory Dmıtrıı Danılchenko.
Ol keshenniń naqtyly syzba boıynsha jumys isteıtinin, sonyń arqasynda TQQ-dan qatqyl shıkizat óndirýge bolatyndyǵyn jetkizdi.
Paıdaly shıkizat alý úshin qoqys óńdeler aldynda suryptalady. ıAǵnı qoqys quramyndaǵy iri zattar, túrli-tústi jáne qara metaldar, áınek pen plastık alynyp tastalady.
Qaldyqtyń jalpy kóleminen 50 myń tonnaǵa jýyq ekinshi shıkizat alý josparlanǵan. Sonyń ishinde: PET - 31%; karton - 24%; tsellofan - 8%; áınek - 29%; plastık - 7%; metall - 7%.
Alynǵan ekinshi shıkizat odan ári óńdeý úshin ózge óndiris oryndaryna jiberiledi. Osylaısha sharýashylyq aınalymy iske asady.
Joba júzege asqan jaǵdaıda 530 jańa jumys orny ashylady. Sonymen qatar, zaýyt aınalasynda ekinshi shıkizatty óńdeıtin ýchaskeler ashý josparlanǵan.
Qoqys suryptaý kesheniniń ashylýy Almaty úshin óte mańyzdy. Óıtkeni, qalada turmystyq qatqyl qaldyqtar barlyq kommýnaldy qoqystyń 95%-yn quraıdy.
Illıýstratsııalyq foto
