Almaty-Kókpek-Kóktal jolynda kólik apatynan 43 jastaǵy adam mert boldy
TALDYQORǴAN. QazAqparat - Almaty-Kókpek-Kóktal jolynda kólik apatynan 43 jastaǵy adam mert boldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa 26 tamyz kúni túngi saǵat 22:30 shamasynda bolǵan. Almaty-Kókpek-Kóktal tas jolynyń 156 shaqyrymynda, ıaǵnı Eńbekshiqazaq aýdanynyń aýmaǵynda eki kólik soqtyǵysqan.
«27 jastaǵy «Yutong» avtobýsynyń kólik júrgizýshisi burylysta qarsy baǵytqa shyǵyp ketip, «Mercedes-Benz» kóligine soǵylǵan. Saldarynan jeńil avtokóliktiń 43 jastaǵy júrgizýshisi oqıǵa ornynda mert boldy. Al jolaýshysy túrli dene jaraqatymen Shelek aýylyndaǵy ortalyq aýrýhanaǵa tústi»,- delingen vedomstvonyń habarlamasynda.
Baspasóz qyzmetiniń aqparatyna sáıkes, qazir osy kólik apaty boıynsha QR QK 345 baby 3 bóligi boıynsha sotqa deıingi tergeý bastaldy.
