Almaty kınostýdııasynyń 70 jyldyǵyna oraı juldyzdar alleıasy ashyldy
ALMATY. 21 qyrkúıek. QazAqparat /Názıra Eleýhan/ - Búgin Almatyda VII Halyqaralyq kınofestıvali sheńberinde Sháken Aımanov atyndaǵy "Qazaqfılm" kınostýdııasynda qazaq kıno maıtalmandaryna arnalǵan juldyzdar alleıasynyń resmı ashylý saltanaty bolyp ótti.
Buǵan deıin, juldyzdar alleıasyna qazaq kınosynyń damýyna úles qosqan Sháken Aımanov, Sultanahmet Qojyqov, Májit Begalın, Abdolla Qarsaqbaev, Seraly Qojamqulov, Qalıbek Qýanyshbaev, Ámına Ómirzaqova, Ánýar Moldabekov, Ydyrys Noǵaıbaev, Nurmuhan Jantórın, Kenenbaı Qojabekov syndy kıno maıtalmandaryna estelik juldyzdar qoıylǵan bolatyn. Endi olardyń qataryna taǵy da 3 estelik taqtalar qosyldy. Ol "juldyzdy taqtalar" - KSRO-nyń jáne Qazaqstannyń Halyq ártisi, Memlekettik syılyqtyń ıegeri, teatr jáne kıno akteri Asanáli Áshimovtyń, kınorejısser, sýretshi, Qazaqstan Respýblıkasynyń eńbek sińirgen óner qaıratkeri, Memlekettik syılyqtyń laýreaty, "Otan" ordeniniń ıegeri, qazaq anımatsııalyq óneriniń negizin qalaýshy Ámen Qaıdarovtyń jáne kınorejısser, Qazaqstannyń Halyq ártisi, QR Memlekettik syılyǵynyń laýreaty, Otan" ordeniniń ıegeri, qazaq ulttyq derekti kınemotografııasynyń negizin qalaýshylardyń biri Oraz Ábishevtiń qurmetine ornatyldy.
"Búginnen bastap ulttyq kınojuldyzdar allleıasy óziniń memorıaldyq sıpatyna ıe bolyp qane qoımaı, búginde jer basyp, ómir súrip jatqan aǵalarymyzdyń attarymen tolyqtyryldy. Bul juldyzdy alleıa ótken adamdarǵa ǵana qurmet emes, sonymen qatar, búginde kózi tiri, qasymyzdy júrgen, qazaq kınosynyń damýyna qomaqty úles qosqan adamdardyń da tiri kezinde eńbegin baǵalaý úshin jasalǵan qurmet", - dep atap ótti Sháken Aımanov atyndaǵy "Qazaqfılm" kınostýdııasynyń prezıdenti Ermek Amanshaev alleıanyń ashylý saltanatynda.
Onyń aıtýynsha, alleıanyń ashylýy Almaty kınostýdııasynyń 70 jyldyǵyna arnalǵan. "Kózi tiri kezimde juldyzdy taqta qoıyp jatqany bir jaǵynan yńǵaısyz, ekinshi jaǵynan qýanyshymdy da jasyrmaımyn. Men bul taqtany meniń eńbegime berilgen baǵa dep bilemin",-dedi Qazaqstannyń Halyq ártisi Asanáli Áshimov.
