Almaty - Qaskeleń tas jolynyń boıynda analar beınesine arnalǵan eskertkish boı kóterdi
ALMATY. 11 qarasha. QazAqparat /Erlik Erjanuly/ - Almaty -Qaskeleń tas jolynyń 26-shaqyrymyndaǵy Radýga aýylynyń mańynda analar beınesine arnalǵan jańa eskertkish boı kóterdi. Bul Almatynyń joǵary jaǵynan Alataýdy bókterleı salynǵan tasjoldyń boıyndaǵy alǵashqy eskertkish bolyp otyr.
Jergilikti kásipkerlerdiń qoldaýymen turǵyzylǵan bul eskertkishte náreste kótergen ana beınesi men besik somdalǵan. Tuǵyrǵa «Anańdy Mekkege úsh ret arqalap aparsań da, qaryzyńnan qutyla almaısyń», «Áıel bir qolymen besikti terbetse, bir qolymen álemdi terbeıdi» degen halyq danalyǵy jazylǵan. Tuǵyrdyń bıiktigi 3 metr, al ana músininiń bıiktigi 4 metrge jetedi. Eskertkishtiń tuǵyry Kúrtiniń granıtinen qalansa, músin qoladan quıylǵan.
"Ony jasaýǵa jarty jyldaı ýaqyt ketti. Bul meniń ana taqyryby boıynsha jasalǵan ekinshi týyndym. Alǵashqysy bıyl maýsym aıynda QR Tuńǵysh prezıdenti qory saıabaǵyna qoıylǵan bolatyn", deıdi músinshi Eldos Beksultan.
Onyń aıtýynsha, qazir elimizde ana taqyrybynda salynǵan eskertkishter az. Ana músini qamtylǵan eskerkishterdiń kóbi basqa taqyryptar aıasyna shoǵyrlanǵan. Almatydaǵy Táýelsizdik monýmenti men Jeltoqsan kóterilisi qurmetine qoıylǵan eskertkishterde de osyndaı jaǵdaı kórinis taýyp otyr. Jalpy elimizde bul taqyrypta salynǵan derbes eskertkish múlde joq deýge de bolady.
