Almaty kásiporyndary «Paryz-2018» baıqaýynda top jardy

ALMATY. QazAqparat - Almatylyq kásiporyndar bıznestiń áleýmettik jaýapkershiligin baǵalaıtyn «Paryz-2018» respýblıkalyq baıqaýynda top jardy, dep habarlaıdy QazAqparat tilshisi qalalyq jumyspen qamtý jáne áleýmettik baǵdarlamalar basqarmasyna silteme jasap.

Atap aıtqanda, «Úzdik ujymdyq shart» atalymynda «Aqsaı» nan-toqash kombınaty» JShS 2-orynǵa taban tiredi.

«Úzdik áleýmettik jaýapkershiligi bar kásiporyn» atalymy boıynsha 2-orynǵa -  «Admi-Ai Plus» ulttyq stıldegi kádesyılar óndirýshisi, 3-orynǵa «Koka-Kola Almaty Bottlers» BK JShS laıyq dep tanyldy.

Konkýrsqa negizinen áleýmettik jaýapkershiligi joǵary kásiproryndar qatysty. Olar múgedekterdi jumysqa ornalastyrý jáne beıimdeý, kásiptik daıarlaý jáne qaıta daıarlaý, sondaı-aq qyzmetkerlerge áleýmettik kómek kórsetý boıynsha baǵalandy.

«Aqsaı» nan-toqash kombınatynyń» bas dırektory Zarına Barlybaevanyń aıtýynsha, kombınatta múgedekter, zeınetkerler men oralmandar jumys isteıdi.

«Bizde múmkindigi shekteýli 27 adam jáne  bala kezden múgedektigi bar 19 adam eńbek etedi. Budan basqa, biz «oralmandar» sanaty boıynsha jumys oryndaryn usyndyq, olardyń sany kásiporyn qyzmetkerleriniń jalpy sanynyń 65% quraıdy», - dedi Zarına Barlybaeva.

Ol sondaı-aq zaýyt qyzmetkerleriniń jalaqysy kóterilgenin atap ótti.

«Biz kelesi jyldy kútpeı, bıyldyń ózinde eńbekaqyny 17,2%-ǵa kóterdik. Sondaı-aq, naýbaıhana baǵyty bar kolledj stýdentteri osynda qosarly oqytýdan ótedi. Bizdiń kombınatta tájirıbeden ótýshiler barlyq óndiristik protsesterdi meńgerip shyǵýǵa qyzyǵýshylyq tanytyp otyr», - dedi kombınat basshysy.

Budan basqa, kásiporyn qaıyrymdylyq is-sharalarymen belsendi túrde aınalysady.

«Bir aı buryn Ekinshi dúnıejúzilik soǵys pen eńbek ardagerlerine azyq-túlik sebetin tabystadyq. Biz ájelerimiz ben atalarymyzdy 9 mamyrda ǵana emes, únemi eske alyp, qurmetteýdi durys kóremiz. Almaty qalasynyń barlyq aýdandarynan múgedektigi bar 80 balaǵa azyq-túlik sebetin berdik. Balalarmen kezdesý «Qaıyrymdy isterdiń qyry» qaıyrymdylyq qory arqyly uıymdastyryldy», - dedi Zarına Barlybaeva.

Jańa jyl qarsańynda kombınat Aýǵan soǵysynyń 30 ardagerine, sondaı-aq «Rýh» múmkindigi shekteýli jandarǵa arnalǵan  psıhologııalyq kómek ortalyǵynyń 28 kelýshisine syılyq daıyndap jatyr.

Budan basqa, nan zaýyty Almaty qalasy boıynsha zaǵıp jandar úshin Respýblıkalyq kitaphananyń 30 qyzmetkeriniń balalaryna syılyqtar jıyntyǵyn jasap jatyr.