Almaty kásipkerleri 10 myńnan astam jumys ornyn qurady
ALMATY. QazAqparat – Almaty ákimi Baqytjan Saǵyntaev máslıhat depýtattarymen karantın kezinde sanıtarlyq qaýipsizdikti qamtamasyz etý, qala tirshiligi men ekonomıkasyn kezeń-kezeńimen qalpyna keltirý jospary Exit Strategy-di iske asyrý máselelerin talqylady, dep habarlaıdy QazAqparat tilshisi.
Beınekonferentsııa rejıminde ótken kezdesýde koronavırýs ınfektsııasyna qarsy is-qımyl jáne epıdemıologııalyq jaǵdaıdy turaqtandyrý sharalary boıynsha máseleler pysyqtaldy. Sondaı-aq kásiporyn qyzmetin kezeń-kezeńimen qaıta jańǵyrtýǵa erekshe nazar aýdaryldy. Aldyn ala málimetter boıynsha, 20 sáýirden bastap sanıtarlyq qaýipsizdikti saqtaý aýdıtinen keıin jumyspen qamtylǵandar sany 540 myń adamǵa jetti. Sonyń ishinde 200 myńǵa jýyǵy Almaty oblysynyń turǵyndary edi. Al 25 mamyrdan taǵy 84,2 myń adam jumysqa shyǵady.
Baqytjan Saǵyntaevtyń aıtýynsha, ekonomıkany qalpyna keltirýdiń negizgi baǵdarlamalary men tetikteri retinde «Jumyspen qamtýdyń jol kartasy», shaǵyn jáne orta bıznesti qoldaý, turǵyn úı qurylysy, údemeli bilim berý nysandarynyń qurylysy bolyp tabylady.
«Jumyspen qamtýdyń jol kartasy» aıasynda 2020-2021 jyldarǵa jalpy somasy 103,9 mlrd teńge bolatyn 214 jobany iske asyrý josparlanǵan. Sondaı-aq áleýmettik-mádenı jáne TKSh nysandaryn, kólik ınfraqurylymyn kúrdeli, ortasha jáne aǵymdaǵy jóndeýden ótkizý, qaıta jóndeýden ótkizý men qurylys júrgizý, eldi mekenderdi abattandyrý kózdelgen. Buǵan qosa 26 myńǵa jýyq jumys orny qurylady. Joba paıdalanýǵa berilgennen keıin 2 myńnan astam turaqty jumys orny ashylmaq.
Sondaı-aq shahar basshysy shaǵyn jáne orta bıznesti qoldaý basymdyqty mindetterdiń biri ekenin tilge tıek etti. Bul sheshimdi júzege asyrý arqyly Almatynyń eldiń qarjy jáne iskerlik ortalyǵy retinde qalyptasýyna tolyq negiz bola alatynyn erekshe atap ótti.
Ákimdik uıytqy bolǵan negizgi baǵdarlama Almaty Business-2025 bolyp tabylady. Sonymen qatar, ótken jyldan bastap respýblıkada «bir tereze» qaǵıdaty boıynsha jumys isteıtin jalǵyz Qoldaý kásipkerlik ortalyǵy qyzmet kórsete bastady. Indýstrıaldy aımaqtyń jumysy jandanyp, shaǵyn ónerkásiptik parkter qurylýda.
Atalǵan jobalar aıasynda «Eńbek»,«Qarapaıym zattar ekonomıkasy», «Damý» KDQ arqyly jobalardy qoldaý sheńberinde kásipkerlik salasynda 10 myńnan astam jumys ornyn ashý josparlanýda.
