Almaty qarttary táýelsizdiktiń 30 jyldyǵyn atap ótti
Sporttyq sharany Almatydaǵy Túrksib aýdandyq belsendi uzaq ómir ortalyǵynyń qyzmetkerleri uıymdastyrdy.
«Búgingi shara el táýelsizdiginiń 30 jyldyǵyna arnalady. Bizdiń ortalyǵymyz qart kisilerdiń uzaq ómir súrýine barynsha jaǵdaı jasaýmen aınalysady. Ortalyqqa kelip júrgen 30 jýyq qart kisi el táýelsizdiginiń mereıtoıyna óz úlesterin qosty. Bul joba Almatyda 2018 jyldan beri jumys istep keledi. Bizdiń aýdanda ortalyq 2019 jyly ashylǵan bolatyn. Bul jerge 60 jastan asqan kisiler keledi. Zeınet jasyndaǵy azamattar skandınav tásilimen júrip, deneni shynyqtyrý arqyly emdelip, ıogamen aınalysady. Ortalyqta dárigerler, psıhologtar, zańgerler keńes beredi. Joba boıynsha bizde kúnine 100 adamǵa kómek kórsetiledi. Olardyń kópshiligi Seıfýllın atyndaǵy saıabaqta sportpen shuǵyldanady», - dedi ortalyqtyń jetekshisi Samat Bısenov.
Búginde bul ortalyqta túrli baǵytta 15 ınstrýktor jumys isteıdi.
«Osynda keletin zeınetkerler bizdiń ortalyqqa rızashylyǵyn bildirip jatyr. Sebebi, 1,5 jylda olardyń densaýlyǵy jaqsaryp, kóńil kúıleri kóterildi. Dos taýyp, aralasatyn orta tapty. Bizdiń esigimiz barlyq kelýshilerge ashyq», - dedi Samat Bısenov.
68 jastaǵy almatylyq Gúlnar Qablaqatova skandınav tásilimen júrýge 4 jyldan beri qatysyp keledi.
«Ortalyqtyń arqasynda jaqsy orta taptym. Meniń ómirimde qıyn jaǵdaı bolyp, anam qaıtys bolǵan edi. Sol sary ýaıymnan shyǵý úshin osynda keldim», - dedi áıel.
Ǵylymı derekterge sáıkes, Skandınav júrisi sport túri retinde Fınlıandııada paıda bolǵan.
Bul sport túri adam bulshyqetiniń 90 paıyzyn jumys istetedi eken.
