Almaty qalasynyń úzdik ustazdary marapattaldy
ALMATY. Tamyzdyń 25-i. QazAqparat /Názıra Eleýhan/ - Búgin Almatyda ótken bilim berý qyzmetkerleriniń tamyz keńesi barysynda qalanyń eń úzdik muǵalimderin QR Bilim jáne ǵylym vıtse-mınıstri Mahmetqalı Sarybekov "Bilim salasynyń qurmetti qyzmetkeri" jáne "Ybyraı Altynsarın" keýde belgilerimen marapattady,
dep habarlaıdy QazAqparat.
Mahmetqalı Sarybekov bilim berý júıesindegi negizgi mindetterge toqtala kele, 2005-2010 jylǵa arnalǵan bilim salasyn damytý memlekettik baǵdarlamasy aıasyndaǵy jumysty qorytyndylady. Onyń aıtýynsha, osy jyldar aralyǵynda bilim sapasyna baǵa beretin ulttyq júıe qurylǵan, mindetti mektep aldy daıarlyq oqýy engizilgen, tehnıkalyq jáne kásibı bilim alý júıesi qaıta qurylymnan ótken, joǵary bilim alýdyń úsh deńgeıli júıesi engizilgen, sońǵy alty jylda bilim salasyn qarjylandyrý kólemi alty esege ósip, elimizde kompıýterlermen jaraqtandyrý naýqany aıaqtalýda.
Onyń aıtýynsha, búgingi tańda josparlanǵan bilim nysandary qurylysynyń aıaqtalýy, mektep janyndaǵy kabınetterdiń ashylýy, 12 jyldyq bilim alýǵa kóshý jaǵdaılary áli de ózekti bolyp otyr.
Vıtse-mınıstr tárbıe jumystaryna basa nazar aýdarý qajet ekendigin, ásirese, balalardyń patrıottyq rýhta tárbıeleý kerektigin atap ótti.
"Elbasy N.Á.Nazarbaev qazaqstandyq bilim salasyn álemdik bilim standartyna saı reformalaý saıasatyna muqııat nazar aýdaryp, árdaıym qoldaý kórsetip otyratyndyǵy ózderińizge jaqsy málim. Elbasy Táýelsizdikti baıandy etýde, bilimniń mańyzdylyǵyn jete túsinýde, ekonomıkalyq jáne qarjylyq qıyndyqtarǵa qaramastan, osy salaǵa barynsha qoldaý kórsetip otyr. El basshysy, sondaı-aq bilim salasyna bólingen qarjyny azaıtpaý jóninde Úkimetke tikeleı tapsyrma berip otyr. Sonyń bir aıǵaǵy, bıyl júzege asqaly otyrǵan bilim salasyn damytýdaǵy 2011-2020 jyldarǵa arnalǵan memlekettik baǵdarlama jobasy", dep atap ótti vıtse-mınıstr.
