Almaty qalasynyń tarıhy mýzeıi jańa jádigerlermen tolyqty
ALMATY. Qazannyń 19-y. QazAqparat /Erlik Erjanuly/ - Almaty qalasynyń tarıhy murajaıynyń jádigerleri Baýyrjan Momyshulynyń dombyrasy jáne jazý mashınkasymen tolyqty. Murajaı dırektorynyń orynbasary Baqbergen Taıshıevtiń aıtýynsha, onda buǵan deıin dańqty qolbasshynyń jeke zattary bolmaǵan edi. Bul shara búgin "Almaty soǵys jyldarynda" degen aıdarmen B. Momyshulynyń 100 jyldyǵyna arnalǵan "Rýhyńa bolashaq bas ıetin, umytylmas erligiń qasıetiń" dep atalatyn kezdesýde júzege asyp otyr.
"Bizdiń qyzmetkerlerimiz jalpy bilim beretin mektepterde, arnaıy jáne joǵary oqý oryndarynda "Almaty soǵys jyldarynda" degen taqyryptaǵy kórmege baılanysty dárister júrgizip otyrady. Olar kóshpeli kórme eksponattary arqyly qalanyń tarıhyn ǵana tanystyryp qoımaı, kórnekti mádenıet, qoǵam jáne memleket qaıratkerleriniń esimin ulyqtap, eńbekterin nasıhattaıdy. Mundaı tálim-tárbıe jumystary kezinde qaharman Baýyrjan Momyshulynyń ómir joly men taǵylymy mol ónegeli isteri úlgi retinde usynylady", - deıdi Baqbergen Jaqsylyquly.
Qalalyq mádenıet basqarmasyna qarasty 4 murajaıdyń biri sanalatyn Almaty qalasynyń tarıhy murajaıynda qazir 30 myńnan astam jádiger bar. Onyń basym bóligi ómiri men qyzmeti Almaty qalasymen tyǵyz baılanysty bolǵandyqtan Alash zııalylarynyń urpaqtary bizge tartý etken muralardy quraıdy. Bul úrdis endi búgin de óz jalǵasyn taýyp otyr.
