Almaty qalasynyń sáýlettik-kórkemdik beınesin qalyptastyrýǵa arnalǵan úzdik 25 joba anyqtaldy
ALMATY. QazAqparat - Almaty ákimdiginde qalanyń sáýlettik-kórkemdik beınesin qalyptastyrý maqsatynda brend-býk (brendtiń qundylyqtary týraly nusqaýlyq) jasaýǵa ashyq baıqaýdyń úzdikterin anyqtaý úshin sarapshylar otyrysy ótti. Bul týraly búgin Almaty qalasy ákimdiginiń baspasóz qyzmetinen habarlady.
Baıqaýdyń maqsaty - Almaty qalasynyń brend-býgyn jasaý boıynsha úzdik tujyrymdamalyq jobalardy anyqtaý. Olarda Almatynyń qala qurylysy dástúri barynsha tolyq qamtylyp, onyń ózindik erekshelikteri, tarıhı-mádenı murasy jáne qazirgi damý barysy eskerilýi tıis. Sondaı-aq, qalanyń jańarýyna septigin tıgizetindeı bolýy kerek.
Baıqaýǵa qatysýǵa shyǵarmashylyq sheberhanalar, jarnamalyq agenttikter men fırmalar, sýretshiler, dızaınerler, sáýletshiler, jobalaý uıymdary, sabaqtas mamandyqtardyń mamandary, sondaı-aq, shyǵarmashylyq joǵary oqý oryndarynyń stýdentteri jáne beıindi bilim berý mekemeleriniń oqýshylary shaqyryldy.
2016 jyldyń 15-shi aqpanyna deıin 109 ótinim qabyldandy.
«109 jumystyń ishinen eń úzdik 25 jumysty tańdap aldyq. Osy úmitkerlerdiń jumysyn ınternet resýrstarda 1 aı kóleminde jarııalaýdy usynamyn. Muny el azamattarynyń barlyǵy kórý kerek. Keler aıdyń sońynda taǵy jınalyp, úzdikterdi iriktep alamyz», - dedi Qala qurylysy jáne sáýlet basqarmasynyń basshysy Ǵabıt Sadyrbaev.
Sarapshy komıssııanyń quramyna sýretshiler, dızaınerler, aqyndar men ónertanýshylar kiretinin aıta ketý kerek.
«Jumystardyń 95%-y tek qalanyń beınesin kórsetken. Brend býk degenimiz tek sýret emes, ol úlken ıdeıa. Almatynyń kóp elmen básekelese alatyn qabileti mol. Týrıstik jaǵynan da, ınvestıtsııalyq klımat jaǵynan da», - dedi Qazaqstan sýretshiler odaǵynyń múshesi Serik Býksıkov.
Aıta ketý kerek, birinshi oryn úshin - 1 000 000 (bir mıllıon) teńge, ekinshi oryn úshin - 800 000 (segiz júz myń) teńge, úshinshi oryn úshin 500 000 (bes júz myń) teńge taǵaıyndalǵan.
