Almaty qalasynyń óńirlik jalpy ishki ónimi Tájikstannan - bes ese, Qyrǵyzstannan - alty ese artyq - qala ákimi
ALMATY. 6 qazan. QazAqparat - Almatyda jan basyna shaqqanda óńirlik jalpy ishki ónimniń kólemi Chehııa, Polsha sııaqty birqatar shyǵys Eýropa elderinen asyp túsedi. Ony qala ákimi Ahmetjan Esimov keshe Respýblıka saraıynda Turar Rysqulov atyndaǵy Qazaq ekonomıka ýnıverıtetiniń 50 jyldyq mereıtoıyna arnalǵan saltanatty keshte aıtty.
"Almatynyń úlesine respýblıkadaǵy barlyq saýda qyzmetiniń 45 paıyzy, baılanys jáne kólik qyzmetiniń 26 paıyzy tıedi. Eldegi shaǵyn jáne orta bıznes sýbektileriniń 35 paıyzy osynda jumys jasaıdy. Negizgi qarjy aǵyny da Almaty arqyly ótedi. Al respýblıkadaǵy jalpy ishki ónimdegi úlesi 20 paıyzǵa jýyq, - dedi A.Esimov.
Shahar basshysynyń aıtýynsha, Almatydaǵy óńirlik jalpy ishki ónimniń kólemi ótken jyly 5,60 trıllıon teńgeni qurady. Bul Tájikstannyń jalpy ishki óniminen 5 ese, Qyrǵyzstannyń jalpy ishki óniminen - 6 ese, al Ózbekstannyń jalpy ishki óniminen - 8,6 paıyzǵa artyq. Ekonomıkanyń ornyqty damýy shahardyń respýblıkalyq bıýdjettiń negizgi donory bolýyna múmkindik berýde. Memlekettik bıýdjet túsimindegi onyń úlesi jyl saıyn 25 paıyzdy quraýda. Al qalalyq bıýdjet túsiminiń 60 paıyzyn shaǵyn jáne orta bıznes qamtamasyz etip otyr.
