Almaty qalasynyń odan ári gúldene túsýine árqaısymyz óz úlesimizdi qosýymyz qajet - A. Esimov
ALMATY. 30 mamyr. QazAqparat /Názıra Eleýhan/ - Demalys kúnderi qaladaǵy Qazaqstan Respýblıkasynyń tuńǵysh Prezıdenti atyndaǵy saıabaqta Almaty qalasynyń ákimdigi men Nicole gúl kompanııasynyń uıymdastyrýymen ótken «Almaty - gúl qala» festıvaline 50 myńǵa jýyq adam qatysty.
Tuńǵysh ret ótkizilgen festıval joǵary deńgeıde atalyp ótildi. Ony uıymdastyrýǵa qala kásiporyndary men uıymdary, gúl ósirýshiler, oqýshylar, ekologııalyq patrýl músheleri belsene aralasyp, atsalysqan.
Festıvalge Almaty ákimi Ahmetjan Esimov arnaıy qatysty. «Bizdiń qala álemniń eń sulý jerinde ornalasqan. Sondyqtan da qalanyń odan ári gúldene túsýine bizdiń árqaısymyz óz úlesimizdi qosýymyz qajet. Almatylyqtar -barynsha sulý, meıirimdi, bilimdi, mádenıetti, tárbıeli halyq. Osy mártebemizdi biz myqtap qolda ustaýǵa tıispiz. Al qala ákimdigi bul baǵytta qoldan kelgenniń bárin jasaıtyn bolady. Ásem, taza, sulý qalada ómir súrýdiń ózi úlken baqyt qoı», - dedi Ahmetjan Esimov sharanyń ashylý rásiminde.
Sonymen qatar ol: "Qala basshylyǵynyń mańyzdy mindeti - ekologııany jaqsartý bolyp tabylady. Bıyl Almatyda 180 myń sharshy metr jerde kógaldandyrý jumystary júrgizilip, úı qasbetteri gúldi shyrmaýyqtarmen kómkeriletin bolady. Osydan úsh jyl buryn 40 myń sharshy metr jer ǵana kógaldandyrylǵan bolatyn", - dep atap ótti. Onyń aıtýynsha, ústimizdegi jyldyń kókteminde jospardaǵy 25 myń aǵashtyń 15 myńy otyrǵyzylyp, eski aǵashtar jańartylý ústinde.
Óz sóziniń sońynda qala ákimi qalalyqtardy, kásiporyn, uıym, mekeme, saýda oryndary men keńse, meıramhana basshylaryn megapolısti gúldendirý isine belsene aralasýǵa shaqyrdy.
Shara barysynda qala basshysy florıstıkalyq baıqaý jeńimpazdaryn marapattap, dıplomdar men baǵaly syılyqtardy tabys etti.
Gúlder jármeńkesine 25 myńnan astam gúl ósirýmen aınalysatyn uıymdar men mekemeler qatysty. Ár gúl ósirýshi kompanııa kórmege tegin qatysty. Kórmege álemdegi on myńdaǵan túrli gúlder, Japonııadan, Frantsııa, Anglııadan arnaıy ákelingen ósimdikter qoıyldy.
Festıvalge kelýshiler úshin graffıtı kórmesi, asfalttaǵy balalar sýreti baıqaýy uıymdastyrylyp, sheberlik synyptar ótkizildi. Qalada tuńǵysh ret gúlmen bezendirilgen avtomobılder, baıkerler, velosıpedıster men mýzykanttar sherýi ótti.
Festıval sońy merekelik otshashýǵa ulasty.
