Almaty qalasynyń máslıhaty depýtattyǵyna 153 úmitker usynyldy

ALMATY. QazAqparat – Almaty qalasynyń máslıhatyna barlyǵy 42 depýtat saılanady. Qazir kandıdattardy usyný jumystary aıaqtaldy. Bul týraly Óńirlik kommýnıkatsııalar qyzmetinde ótken baspasóz máslıhatynda Almaty qalasy Aýmaqtyq saılaý komıssııasynyń tóraǵasy Aıgúl Qalyqova málim etti, dep habarlaıdy QazAqparat tilshisi.

Aıtýynsha, qalalyq máslıhatqa 42 depýtat saılanady. Onyń 21-i bir mandattyq aýmaqtyq saılaý okrýgterinen, 21-i partııalyq tizim boıynsha daýys jınaıdy. Qazir 6 saıası partııanyń tizimderimen 153 kandıdat usynyldy.

«Atap aıtqanda, «Qazaqstan Halyq partııasy» qoǵamdyq birlestigi 42 kandıdat, «Aq jol» Qazaqstan demokratııalyq partııasy» qoǵamdyq birlestigi – 20, «AMANAT» partııasy» qoǵamdyq birlestiginiń Almaty qalalyq fılıaly – 63, «Aýyl» Halyqtyq-demokratııalyq patrıottyq partııasy» qoǵamdyq birlestigi – 6, «Respublica» partııasy» qoǵamdyq birlestigi – 15, «Qazaqstannyń «Baıtaq» jasyldar partııasy» qoǵamdyq birlestigi 7 úmitker usyndy», - deıdi Aıgúl Qalyqova.

Spıkerdiń aıtýynsha, saıası partııalar qujattardy «Saılaý týraly» Konstıtýtsııalyq zańnyń talaptaryna sáıkes usyndy. Árbir partııalyq tizimde áıelder men 29 jasqa tolmaǵandar sany – keminde 30 paıyz.

«Almaty qalasy máslıhaty depýtattaryn saılaý boıynsha 21 birmandattyq aýmaqtyq saılaý okrýgteri boıynsha 210 kandıdat usynyldy. Ortasha eseppen bir mandatqa 10 adamnan keledi. Eń úlken básekelestik 4-okrýgte – bir oryn úshin 19 adam. Usynylǵan kandıdattardyń 166-sy er, 44-i áıel adam. Eń jas kandıdat 21 jasta bolsa, eń úlkeni 1947 jyly týǵan», - dep atap ótti ol.