«Almaty qalasynyń Qurmetti azamaty» ataǵyna usynylǵan tulǵalardyń esimi belgili boldy
MATY. 21 qazan. QazAqparat /Názıra Eleýhan/ - Almaty qalasynda ótken kezekti máslıhatta depýtattar «Almaty qalasynyń Qurmetti azamaty» ataǵyna usynylǵan tulǵalardyń esimin bekitti.
Oǵan: qazaq ádebıetin damytýǵa aıyryqsha eńbegi men Almaty qalasynyń qoǵamdyq ómirine belsene aralasqany úshin - aqyn Marfýǵa Aıtqojına, eldiń rýhanı jáne ıntellektýaldy áleýetin arttyrýǵa qosqan eleýli úlesi úshin jáne belsendi qoǵamdyq qyzmeti úshin - QR UǴA akademıgi Salyq Zımanov, teatr ónerin damytýǵa sińirgen eren eńbegi úshin jáne belsendi qoǵamdyq qyzmeti úshin - Qazaqstannyń halyq ártisi Sábıt Orazbaev kirdi.
Marfýǵa Aıtqojına - Memlekettik syılyqtyń laýreaty, «jyr aqqýy» atanǵan belgili qazaq aqyny. M. Aıtqojına lırıkalyq óleńdermen qatar, kóptegen ánderdiń avtory. Aqyn Almaty qalasyna arnap kóptegen jyrlar men arnaýlar jazǵan.
Salyq Zımanov - QR UǴA akademıgi, zań ǵylymdarynyń doktory, professor, Memlekettik syılyqtyń laýreaty, Uly Otan soǵysynyń ardageri. Salyq Zımanuly memleketimizdiń Ata zańynan bastap, táýelsizdik tarıhynda zań ǵylymynyń berik negizin qalyptastyrǵan tulǵa.
Sábıt Orazbaev - Qazaqstannyń halyq ártisi, Memlekettik syılyqtyń laýreaty. Akterdiń qazaq ónerin damytýdaǵy qosqan eńbegi zor. Halyq ártisi teatr sahnasynda 100-den astam rólderdi somdady. Ol, sonymen qatar kóptegen kınofılmderge túsken.
