Almaty qalasynyń komendanty halyqqa úndeý jasady
«QR Prezıdenti Qasym-Jomart Toqaevtyń Jarlyǵymen Almatyda komendanttyq saǵat engizildi. Qoǵamdyq tártipti qadaǵalaýǵa quqyq qorǵaý organdary, Últtyq ulan men Qorǵanys mınıstrliginiń sarbazdary jumyldyryldy. Olar zańnyń azamattardyń konýstıtýtsııalyq quqyqtary men qoǵamdyq qaýipsizdikti qamtamasyz etýde»,-dedi Q.Taımerdenov.
«Tótenshe jaǵdaı týraly» QR zańyna sáıkes, tótenshe jaǵdaı kezinde arnaıy sharalar men ýaqyta shekteýler engiziledi jáne olar múltiksiz oryndalýy kerek.
Sonymen qatar ol tótenshe jaǵdaı rejımin buzǵany úshin Qazaqstan zańdaryna sáıkes jaýapkershilik qarastyrylǵanyn eske saldy.
«Azamattardy osy talaptardy saqtap, múlikti talqandaý, tonaý jáne ekstremıstik áreketterge qarsy baǵyttalǵan sharalarǵa túsinistikpen qaraýǵa shaqyramyn. Ókinishke qaraı, 5 qańtar túninde ekstremıstik toptar belsendi áreket ete bastady. Olardyń zańsyz áreketteriniń saldarynan 120-dan astam kólik órtendi, onyń ishinde polıtsııa men jedel járdemniń kóligi jáne órt sóndirýshi kólikter bar. Zańsyz áreketterdiń zardabyn bıznes te tartty: 120 dúken men 180 qoǵamdyq tamaqtaný orny jáne shaǵyn jáne orta bıznestiń 100 keńsesi qırady. 500-den astam adam soqqyǵa jyǵyldy, olardyń arasynda 130 áıel men qart adam»,-dep málimdedi qala komendanty.
Onyń sózinshe, búgin ekstremıster men radıkaldar qalaǵa taǵy shabýyldady. Azamattardyń ómiri men qaýipsizdigin qamtamasyz etý úshin barlyq qajetti shara qolǵa alyndy.
«Biz kóshege shyqqandardy úılerine taraýǵa shaqyramyz. Bizdiń basty maqsatymyz – jaǵdaıdyń shıelenisýiniń aldyn alý. Men qala turǵyndary men qonaqtaryn úılerinde bolýǵa, úreıge, arandatýǵa boı aldyrmaýǵa, aqparattardy tek resmı kózderden alýǵa jáne elimizdiń zańdaryn qurmetteýge shaqyramyn»,-dedi Q. Taımerdenov.
Aıta keteıik, Almatyda jaǵdaıdyń ýshyǵýyna baılanysty tótenshe jaǵdaı engizildi.
Gúlzat Sahova
