Almaty qalasynyń káriz ınfraqurylymyn ońaltýǵa arnalǵan Qazaqstan men Frantsýz Úkimetteriniń arasyndaǵy hattamanyń kúshi joıyldy
ASTANA. Jeltoqsannyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń Úkimeti men Frantsýz Respýblıkasynyń Úkimeti arasyndaǵy Qarjylandyrý týraly hattamanyń (Almaty qalasynyń sýmen qamtamasyz etý jáne káriz ınfraqurylymyn ońaltý men jańǵyrtý jobasy) kúshin joıý týraly» zań jobasy maquldandy,
dep habarlaıdy QazAqparat.
«Eki el úkimetteri arasyndaǵy 27 mln. 440 myń eýro mólsherindegi qarjylandyrý hattamasyna 2000 jyldyń qazanynda qol qoıylǵan bolatyn. Bundaǵy zaem jyldyq 2,1 paıyz stavkamen 16 jylǵa berilmekshi edi. Atqarýshy agenttik retinde Almaty qalasynyń ákimdigi belgilense, kredıtory frantsýzdyq bank bolatyn. Al sońǵy tapsyrysshy jarǵylyq kapıtaly 71,5 myń teńgeni quraıtyn «Almatysý» JAQ bolatyn. Sonymen birge, zaemdy qaıtarý týraly Frantsýz Úkimeti men QR Qarjy mınıstrligi, Almaty qalasy ákimdigi jáne «Qazaqstannyń damý banki» arasyndaǵy kelisimshartqa 2002 jyly qol qoıyldy. Degenmen Hattamanyń «Almatysý» jáne «Eýropa Qaıta qurý jáne Damý banki» arasynda 5 mln. dollardan kem bolmaıtyn qosarlas qarjylandyrý jónindegi bóligine qol qoıylmady. Almaty ákimdiginiń aqparatyna sáıkes, jobanyń oryndalmaýyna shyǵyndardy óteý maqsatynda qaladaǵy sý tarıfteriniń qunyn 50 paıyzǵa arttyrý týraly máseleniń kóterilgeni sebep bolǵan. ıAǵnı, nesıe usynýshylar tarapynan kóterilgen sol kezdegi bundaı tarıftik saıasat qoldaý tappady. Nátıjesinde «Almatysý» JAQ bul jobaǵa qatysýdan bas tartty. Al ákimdik «Almatysýdyń» ornyna «Sý arnasy» MKK-yn usynǵan bolatyn. Biraq, Frantsýz tarapy tapsyrys berýshiniń senimdiligine kúmánmen qarap, jobany júzege asyrýdyń múmkindigine shák keltirdi. Osyǵan oraı, sońǵy sharttardyń oryndalmaýy saldarynan atalǵan hattama kúshine engen joq», dedi zań jobasy boıynsha túsinik bergen QR Qarjy mınıstri Bolat Jámishev.
Hattamanyń kúshine enbeýine oraı, bıýdjettik zaemdar da jumsalmaǵan. Al aǵymdaǵy jylǵy Qazaqstan-Frantsýz ekonomıkalyq yntymaqtastyq jónindegi úkimetaralyq komıssııanyń otyrysy barysynda qazaqstandyq tarap osy joba aıasynda frantsýzdyq zaemnan bas tartý nıetin resmı habarlap, frantsýzdar ony quptaǵan.
