Almaty qalasynyń ishinde 26 polıtsııa beketi uıymdastyrylady

ALMATY. QazAqparat – Almatyda karantındik sharalardy kúsheıtý maqsatynda qalanyń ishinde 26 beket uıymdastyrylady. Bul týraly búgin onlaın brıfıng barysynda qalalyq Polıtsııa departamentiniń basshysy Qanat Taımerdenov aıtty, dep habarlaıdy QazAqparat tilshisi.

«Osy maqsatta karantındik sharalardy kúsheıtý úshin qalada júris bóligin taryltý jáne shekteý belgilerin ornatý arqyly 26 post uıymdastyrylady. Tótenshe jaǵdaıdyń rejımin qasaqana buzatyn avtokólik ıeleri QR ÁQbK-niń 785 babyna sáıkes aıyppul turaǵyna jóneltiletin bolady. 65 jastan asqan azamattarǵa úıden nemese páterlerinen shyqpaý usynylady. Kóshede úlken adamnyń qaraýynsyz júrgen kámeletke tolmaǵandarǵa erekshe nazar aýdarylady. Eger kámeletke tolmaǵan balalar kóshede júrgeni anyqtalsa, olardyń ata-analary nemese qamqorshylary QR ÁQbK-niń 476 babyna (Tótenshe jaǵdaı rejımin buzý) sáıkes ákimshilik jaýapqa tartylady», - dedi PD basshysy Qanat Taımerdenov.