Almaty qalasynyń ekologııalyq tazalyǵy úshin avtokólikterdi «Eýro-5», «Eýro-6» standarttaryna kóshiretin kez jetti - EO sarapshysy
ASTANA. Naýryzdyń 11-i. QazAqparat /Qanat Mámetqazyuly/ - Almaty qalasynyń ekologııalyq tazalyǵy úshin avtokólikterdi «Eýro-5», «Eýro-6» standarttaryna kóshiretin kez jetti. Búgin QR Parlamenti Májilisinde Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasynyń tanystyrlymy barysynda jobanyń bas sarapshysy Bolat Esekın osylaı málim etti,
dep habarlaıdy QazAqparat.
«Almaty qalasyndaǵy avtokólikter úshin «Eýro-2» standarty eskirdi. Shyndyǵynda, bul standartty engizerde kóptegen pikirtalastar týǵany belgili. Degenmen, halyqaralyq sarapshylar atalmysh «Eýro-2» standartyn ekologııalyq baqylaý júıesi úshin alǵashqy qadam dep qana baǵalaıdy ári bul Eýropada osydan on bes jyldaı buryn qabyldanǵan. Osy standartty negizinen ózderinde avtoóndirisi damymaǵan elder qabyldaǵan bolatyn. Al Almaty qalasyna keletin bolsaq, bundaǵy kólikterdiń basym bóligi shetelden ákelingen, eskirgen kólikter, benzın de syrttan tasylady ári sapasy da óte tómen. Sondyqtan da, qala ekologııasyn jaqsartý úshin avtokólikterdi «Eýro-5», «Eýro-6» standartyna kóshiretin kez jetti. Osyny eskerý qajet. Al negizgi lastaýshy kózderdiń biri kólikter bolyp tabylatyn Almaty sekildi qalada «Eýro-2» standartymen aýany jaqsartýǵa kúresip jatyrmyz dep úmittenýge múldem bolmaıdy», dedi B. Esekın.
Sonymen birge, bas sarapshy Almaty ekologııasy úshin qoǵamdyq kólik túrlerin de jaqsartý qajettigin alǵa tartty. Onyń paıymdaýynsha, eger qoǵamdyq kólik sheteldegideı jaıly bolsa, azamattar jeke basyna kólik ıelenýge sonshalyqty qumartpas edi. «Eýropanyń ásem qalalarynyń biri Venada kóptegen qyzmetkerler qoǵamdyq kólikti paıdalanýdy jón kóredi. Óıtkeni, bul jaıly ári ýaqyt únemdeý turǵysynan da tıimdi. Al jeke avtokólikter úshin osy qalada birqatar shekteýler, qosymsha tólemder qarastyrylǵan», dedi B. Esekın.
