Almaty qalasynyń Áýezov aýdany ákimdigi Oraza tutqan turǵyndarǵa aýyzashar uıymdastyrdy

Aýyzasharǵa Almaty qalasy din isteri departamentiniń ókilderi, aýdan ákimi apparatynyń qyzmetkerleri, aýdandyq qyzmetterdiń basshylary, buqaralyq aqparattar quraldarynyń ókilderi shaqyryldy.

Atalmysh sharaǵa Áýezov aýdanynyń ákimi Bekqalı Torǵaev arnaıy qatysty. Ol barsha qaýymdy qasıetti Ramazan aıymen quttyqtap, jyly lebizin bildirdi. «Orazalaryńyz berik bolsyn! Alla taǵala tilegen tilek-duǵalaryńyzdy qabyl etsin! Ramazan aıyndaǵy barsha jaqsylyqtardy Alla taǵala násip etip, shapaǵaty men meıirimi barshańyzǵa tıe bersin! Kelesi Ramazan aıyna deıin elimiz aman, jurtymyz tynysh bolsyn!», - dedi B. Torǵaev.

Óz izgi nıetterin «Taýgúl» meshitiniń bas ımamy Orynbasar Dáýrenbekov te aıtty. «Qazir jastar arasynda ımandylyqqa bet buryp, namaz oqýǵa talpynǵandary qýantady. Oraza tutyp júrgen jan esh ýaqytta bireýdiń ala jibin attap, bireýdi-bireýge jamandap, dóreki sózder aıtpaıdy. Osy qaǵıda árkimniń jadynda bolý kerek. Bir aı boıy iship-jeýden ǵana emes, ótirik-ósek aıtý, bireýdi syrtynan ǵaıbattaý, beıádep sózder men qylyqtar sııaqty adamgershilik qaǵıdalaryna jat ádetterden aýlaq bolý kerek. Sáresi tamaǵy - bereket. Bir jutym sý da bolsa, ony tastamaý kerek. Óıtkeni Allah sáreside tamaqtanǵandarǵa raqymdylyq etip, perishteleri de olar úshin keshirim tileıdi. Sonymen qatar, «Men - orazamyn» deý de súnnet. Eger bireý oraza ustaýshyǵa daýys kóterip sóılese, keriskisi kelse, «men - orazamyn» dep eskertýi tıis», - dedi meshittiń bas ımamy.

«Bul aıda qaıyrymdylyq pen jaqsylyqty kóp jasap, meshitterge baryp duǵa qylý qajet, jarly-jaqybaı men jetim-jesirge pitir-sadaqa berý kerek. Oraza - musylmannyń bes paryzynyń biri. Ramazan aıynda musylmandar ózin-ózi rýhanı jaǵynan jetildirýge múmkindik alady. Oraza ustaǵan adamǵa kimde-kim sáresin daıyndap berse, nemese aýyzasharǵa shaqyrsa saýabyn alady», - dep atap ótildi aýyzashar barysynda.