Almaty qalasynyń ákimi Qazaqstan Kýbogynyń ıegeri - «Qaırat» komandasymen kezdesti
ALMATY. QazAqparat - Búgin Almaty qalasynyń ákimi Ahmetjan Esimov Qazaqstan Kýbogynyń ıegeri, Qazaqstan Chempıonatynyń qola júldegeri «Qaırat» komandasynyń oıynshylarymen jáne jattyqtyrýshylar quramymen kezdesti. Bul týraly Almaty qalasy ákiminiń baspasóz qyzmetinen habarlady.
Kezdesý barysynda qala basshysy komandaǵa Chempıonattyń qola medalderin tabys etip, bıylǵy maýsymdaǵy jetistikterimen quttyqtap, b ul joǵary nátıjege Almaty qalasynda kásibı fýtbol júıesin durys jolǵa qoıýdyń arqasynda qol jetkizilgendigin jetkizdi.
«Biz Sergeı Kvochkın atyndaǵy balalar akademııasyn, Tımýr Segizbaev atyndaǵy jasóspirimder akademııasyn qurdyq. Qazir «Qaırat» komandasynyń negizgi quramyna arnalǵan bazanyń qurylysy aıaqtalyp keledi. Bizdiń maqsatymyz - fýtboldy buqaralyq sıpatqa ıe etý jáne komandanyń damýyna barynsha jaǵdaı jasaý», - dedi Ahmetjan Esimov.
Ákim sonymen qatar, Almaty qalasynda sońǵy jyldary iri sporttyq sharalardyń, solardyń ishinde fýtbol boıynsha iri jarystardyń ótip jatqandyǵyn tilge tıek etti.
Esterińizge sala ketelik, bıyl, «Qaırat» komandasynyń 60 jyldyq mereıtoıyna oraı, komandanyń aty ańyzǵa aınalǵan oıynshylary men Álem qurama komandasy kezdesti. Shet elderden Álem Kýbogynyń, Chempıondar Lıgasynyń ıegerleri, Álemniń jáne Eýropanyń úzdik oıynshylary atanǵan fýtbolshylar keldi. Sonymen qatar, «Qaırat» komandasy men Ispanııa quramasynyń ardagerleri arasynda Almaty qalasynyń kúnine oraı joldastyq kezdesý ótkizgendigin de aıta ketken jón.
