Almaty qalasynyń ákimi áıelder qaýymyn aldaǵy merekemen quttyqtady
ASTANA. QazAqparat - Almaty qalasynyń ákimi B.Baıbek áıelder qaýymyn aldaǵy bolatyn 8 naýryz merekesimen quttyqtady, dep habarlaıdy qala ákimdiginiń baspasóz qyzmeti.
Halyqaralyq áıelder merekesi qarsańynda Abaı atyndaǵy memlekettik akademııalyq opera jáne balet teatrynda merekelik kontsert ótti. Almaty ákimi Baýyrjan Baıbek saltanatty sharada qalanyń barlyq áıelder qaýymyn kóktemniń alǵashqy merekesimen quttyqtady.
«Barlyqtaryńyzdy kógildir kóktemniń merekesi - Halyqaralyq áıelder kúni 8 naýryzben quttyqtaımyn!
Barlyq kezeńde, barsha halyq jany názik áıelderdi mahabbattyń, baqyt pen izgiliktiń sımvolyna balaǵan. Qazaq qoǵamynda áıeldiń mártebesi qashanda joǵary, ol qurmet pen abyroıǵa ıe, ana otbasynyń dińgegi, dástúr men adagershiliktiń jalǵasy. Tarıh jylnamasyna kóz júgirtsek, burynǵy analaramyzdyń memlekettik deńgeıde oılap, aqylgóı keńesshi bolǵandyqtaryn da bilemiz. Áıelder elimizdiń qoǵamdyq-saıası ómirine belsene aralasyp, ózderiniń biliktiligin kórsetip júr. Búgingi áıelder - bilikti basshy, kásipker, saıasatker, áskerı qyzmetshi, sportshy. Bulardan basqa mamandyqtar men áleýmettik ról áıelder úshin normaǵa aınalǵan», - dedi óziniń sózinde qala ákimi.
Saltanatty jıynǵa qalanyń qurmetti áıelderi: QazKSR Joǵary keńesi tóralqasy tóraǵasynyń burynǵy orynbasary, Sotsıalıstik Eńbek eri Vera Sıdorova, Qazaqstannyń Eńbek eri, №159 gınazııa dırektory Aıagúl Mırazova, Sotsıalıstik Eńbek eri Lıdııa Kochetova, aqyn, Memlekettik syılyq ıegeri Marfýǵa Aıthojına, QR Syrtqy Іster mınıstrliginiń aıryqsha tapsyrmalar jónindegi elshisi Aqmaral Arystanbekova, QR ǴA-nyń akademıgi Álııa Beısenova, aqyn, QR-y alǵashqy Gımniń avtory, Memlekettik syılyqtyń laýreaty Jadyra Dáribaeva, telejúrgizýshi, aktrısa, prodıýser, kóp balaly ana Saltanat Qalıeva jáne basqalary, barlyǵy 790-daı adam qatysty.
«Áıelder aspannyń teń jartysyn arqalap keledi» degen naqyl sóz bar. Shyndyǵyna kelgende, sizder ıyqtaryńyzben búkil álemdi kóterip kelesizder. Rasynda da solaı! Biz barlyǵymyz Táýelsizdiktiń alǵashqy jyldaryn jaqsy bilemiz. Qıyn kezeńge alǵashqy bolyp beıimdelgen de áıelder qaýymy. Jańa ekonomıkany tez arada meńgerip, jas memleketimizdiń aıaǵynan tik turýyna aıanbaı úles qostyńyzdar.
Shaǵynjáne orta bıznesti damytyp, táýekelge baryp, jańa isterdi qolǵa aldyńyzdar. Sonyń arqasynda búgingi kúni 13,5 myńnan astam almatylyq áıelder shaǵyn jáne orta bıznesti dóńgeletip otyr. Al memlekettik qyzmette basshy laýazymdaǵylardyń 27 paıyzy - áıelder. Qalanyń densaýlyq saqtaý men bilim berý salasyndaǵylardyń basym kópshiligi áıelder. Memleket basshysy aıtyp ótkendeı, «barlyq áleýmettik blok bizdiń názik jandy áıelderimizdiń ıyǵynda» sizder qolǵa alǵan isterdiń barlyǵy da tabysty. Óıtkeni, áıelderdiń ómirdegi mániniń ózi - jasampazdyq», - dep atap ótti ákim.
Saltanatty sharada Shámshi Qaldaıaqovtyń «Ana týraly jyr» ánin Almaty qalasy ákimdiginiń estradalyq- sımfonııalyq orkestriniń súıemeldeýimen A. Jubanov atyndaǵy mýzyka mektebiniń ul balalar hory oryndady, dırıjeri QR-nyń Eńbek sińirgen qaıratkeri Aleksandr Belıakov, Polad Bıýl-Bıýl Oglynyń «Potomý, chto ty lıýbısh menıa» ánin IL canto kvarteti men «Vıvat» shoý baleti, «Arnaý» dýeti Jomart Qadyralıevtiń «Egiz Lebiz» ánderin oryndady. Budan basqada ánder oryndalyp, kópshiliktiń kóńilinen shyqty.
Kontsert sońynda jınalǵandardyń barlyǵy qosylyp «Ádemi - aý» ánin oryndady.
