Almaty qalasynyń 2017 jylǵy bıýdjeti naqtylandy
Qalanyń jalpy ishki óniminiń 2,6 paıyzǵa artqanyn, jergilikti jáne respýblıkalyq bıýdjetterdiń kiristeri boıynsha jospardyń artyǵymen oryndalǵanyn, sondaı-aq 123 mlrd teńgeniń únemdelgenin esepke alǵanda aǵymdaǵy jylǵa bıýdjetti naqtylaý somasy 48,9 mlrd teńgeni qurady.
Qarjylar Almaty qalasynyń 2020 jylǵa deıingi damý baǵdarlamasyn júzege asyrýǵa baǵyttalady.
Atap aıtqanda, 95 shaqyrym avtobýs joldaryn jóndeýge 2,5 mlrd teńge qosymsha jumsalady, Alǵabas, Aqbulaq, Qalqaman shaǵynaýdandaryna kiretin jańa joldar qurylysyna 2,4 mlrd teńge baǵyttalady.
Sondaı-aq 297 jańa avtobýs, 40 evakýator satyp alýǵa 11,5 mlrd teńge jumsalmaq.
Qalany abattandyrý men kóriktendirýge 19,7 mlrd teńge qarastyrylyp otyr. Jibek joly, Panfılov, Qabanbaı batyr, Gogol kósheleri dat sáýletshisi ıAn Geıldiń tujyrymdamasyna sáıkes ózgeretin bolady.
472 aýlany abattandyrýǵa - 7,7 mlrd teńge, «Dýman» shaǵynaýdanyndaǵy eski qorymdy jóndeýge - 200 mln teńge, áleýmettik salany damytýǵa qosymsha 2,6 mlrd teńge jumsalady.
«Atap aıtqanda, 207,6 mln teńgege mektepke deıingi bilim berý mekemelerindegi memlekettik tapsyrysty ulǵaıtý, apatty jaǵdaıdaǵy 8 balabaqshany jóndeý kózdelgen.
Aıta ketý kerek, bıyl jergilikti bıýdjetke salyq túsimderi 6 paıyzǵa, respýblıkalyq bıýdjetke 4 paıyzǵa artyq tústi.
Budan bólek, mindetti áleýmettik medıtsınalyq saqtandyrý júıesin engizý úshin 2148 kompıýter satylyp alynbaq.
Al jańa onkologııalyq ortalyq qurylysyna 557,9 mln teńge, áleýmetik turǵydan az qamtylǵan otbasylardy qoldaýǵa 1,8 mlrd teńge baǵyttaý josparlanǵan. Qaladaǵy buqaralyq sportty damytýǵa qosymsha 758,5 mln. teńge qarastyrylyp otyr.
Almaty ákimdiginiń baspasóz qyzmetinen habarlaǵandaı, Almatyda keler jyldyń sońynda BUU aımaqtyq haby ashylady. Munda 19 álemdik uıymnyń ókildikteri oryn tebedi. Jańa nysan qurylysynyń jobalaý-smetalyq qujattamasyn jasaýǵa 50 mln teńge bólinbek.