Almaty qalasyndaǵy saıabaqtardyń birine Shámshi esimi berilse, onda kompozıtordyń eskertkishi ornatylsa ıgi - Q. Aıtahanov
ASTANA. Naýryzdyń 5-i. QazAqparat /Qanat Mámetqazyuly/ - Sh. Qaldaıaqovtyń 80 jyldyǵy qarsańynda kompozıtordyń tulǵa bolyp qalyptasýy men kórkem týyndylary dúnıege kelgen Almaty qalasyndaǵy saıabaqtardyń birine Shámshi esimi berilse, sol saıabaqta oǵan eskertkish ornatylsa ıgi. Búgin QR Parlamenti Senatynyń jalpy otyrysynda Úkimet basshysynyń atyna joldaǵan saýalynda senator Qýanysh Aıtahanov osylaı málim etti,
dep habarlaıdy QazAqparat.
«Aǵymdaǵy jylǵy tamyzdyń 15-inde ulttyq ónerimizdiń daryndy ókilderiniń biri, kórnekti kompozıtor, Qazaqstan Respýblıkasynyń halyq ártisi, Qazaqstan Respýblıkasy Memlekettik Ánurany avtorlarynyń biri - Shámshi Qaldaıaqovtyń týylǵanyna 80 jyl tolady. Jarty ǵasyrdan asqan ýaqyt boıy qazaq dalasyn ásem sazymen terbetken Shámshi ánderi kúlli qazaqstandyqtardy otan súıgishtikke, týǵan el men jerge adaldyqqa tárbıelep, yntymaq pen birlikke shaqyrýǵa qyzmet etip keledi. Sazgerdiń bıik rýhtaǵy halqymen birge jasaıtyn ánderi árqashanda bolashaq urpaqqa da qyzmet ete bereri sózsiz. Osyǵan oraı, ásem de jigerli ánderimen ultymyzdyń birneshe urpaǵyn tárbıelegen Shámshi Qaldaıaqovtyń 80 jyldyǵyn ótkizý, ony respýblıka kóleminde atap ótý úshin arnaıy Úkimettik komıssııa qurylsa», dedi Q. Aıtahanov. Sonymen birge, depýtat Sh. Qaldaıaqovtyń tulǵa bolyp qalyptasýy men kórkem týyndylary dúnıege kelgen Almaty qalasyndaǵy saıabaqtardyń birine Shámshi esimin berý qajettigin, sol saıabaqta kompozıtordyń eskertkishi ornatylsa degen tilegin jetkizdi.
«Budan bólek, Shámshi murasyn bir ortalyqqa jınaqtaǵan memorıaldyq murajaı ashylsa - birtýar tulǵaǵa kórsetilgen úlken qurmet bolary anyq. Elordamyz Astanada Sh. Qaldaıaqov pen J. Nájimedenov kósheleri bastaý alatyn saıabaqta táýelsiz memleketimizdiń Ánuranynyń avtorlary, qos talantqa arnalǵan eskertkish turǵyzylsa elorda kelbeti ajarlana túser edi. Sondaı-aq, Sh. Qaldaıaqov týraly derekti fılm túsirilip, kitaptar men ánder jınaǵyn, tańdamaly dıskilerin shyǵarý máselelerin sheshýge Úkimet yqpal etse ıgi», dedi Q. Aıtahanov.
