Almaty qalasyndaǵy eń úzdik joǵary oqý orny anyqtaldy
ASTANA. QazAqparat - Almaty qalasy ákimdiginiń apparaty, Jastar saıasaty máseleleri basqarmasy jáne «Elite» rekrýtıngtik kompanııasy birlesip Almaty qalasyndaǵy joǵary oqý oryndarynyń arasynda reıtıng júrgizdi. Onyń nátıjesi boıynsha ál-Farabı atyndaǵy Qazaq ulttyq ýnıversıteti 1-shi oryndy ıelendi.
Reıtıng jumys berýshilerdiń túlekterdiń quzyrettilikterin baǵalaýy jáne JOO janyndaǵy mansap ortalyqtarynyń qyzmetine baǵa berý negizinde jasaldy. Júrgizilgen zertteýge sáıkes, HR mamandary jáne kompanııalardyń jetekshileri sońǵy 3 jyl ishinde ózderine jumysqa ornalasyp, qazir eńbek etip júrgen túlekterge baǵa berdi. Reıtıngti qurastyrýda qala ekonomıkasyndaǵy barlyq salalar boıynsha 425 kompanııada saýalnama júrgizildi.
Zertteý barysynda básekege aıryqsha qabiletti jas mamandardy daıarlaıtyn joǵary oqý oryndary olardyń bilim deńgeıiniń sapasyna ǵana emes, sonymen birge stýdentterdiń boıynda jigerlilikti, kommýnıkatıvti daǵdylardy, qıyn jaǵdaılarǵa ıkemdelýge beıimdiligin arttyrýǵa kóńil bólgeni aıqyndaldy, delingen atalmysh ýnıversıtettiń resmı saıtynda.
