Almaty qalasyndaǵy Alataý aýdanyna eki jyl toldy
ALMATY. Shildeniń 3-i. QazAqparat /Ádilet Musahaev/ - Búgin Almatyda Alataý aýdanynyń qurylǵanyna eki jyl tolýyna jáne Astana qalasynyń 12 jyldyq mereıtoıyna oraı merekelik shara ótti.
Atalmysh aýdan 2008 jylǵy shildeniń 2-sinde máslıhat pen qalalyq ákimdiktiń sheshimimen qurylǵan edi.
Jer kólemi 7567 gektardy quraıtyn aýdanda qazirgi kúni 158 300 adam turyp jatyr. Aýdan ortalyǵy bolyp «Shańyraq-2» yqshamaýdany belgilenip, qazirgi tańda bul jerde aýdandyq salyq basqarmasy, halyqqa qyzmet kórsetý ortalyǵy, sot, poshta bólimshesi, prokýratýra organdarynyń jáne ákim apparatynyń ǵımaraty boı kótergen. Al «Áıgerim-1» yqshamaýdanynda aýdandyq tótenshe jaǵdaılar bólimi ornalasyp, jumys isteýde.
Merekelik shara barysynda aýdan turǵyndaryna kontserttik baǵdarlamalar usynylyp, túrli sporttyq oıyndar uıymdastyryldy.
