Almaty qalasynda páterdiń baǵasy tym joǵary - Prezıdent
ALMATY. QazAqparat - Memleket basshysy Qasym-Jomart Toqaev Almaty qalasy jurtshylyǵymen kezdesýinde qaladaǵy páter baǵasy týraly aıtty, dep habarlaıdy QazAqparat.
«Almaty turǵyndarynyń kópshiligi, ásirese, jastar úshin baspana – eń ózekti másele. Qalada páterdiń baǵasy tym joǵary. Árıne, eńbek jolyn endi ǵana bastaǵan jastar birden páter satyp ala almaıtyny túsinikti. Biraq, solaı eken dep esh qareketsiz qol qýsyryp otyrýǵa bolmaıdy. Jastardyń baspana alýyna jan-jaqty jaǵdaı jasaý kerek. Bul – memlekettiń basty mindetiniń biri. Ákimdik jalǵa beriletin turǵyn-úı salý úshin ınvestorlarǵa tartymdy bolatyn tıimdi tásilder oılastyrýǵa tıis. Biraq jaldamaly úıler tym qymbatqa túspeýi kerek. Ondaı páterler, eń aldymen, qoljetimdi bolýǵa tıis. Jalpy, Almaty jastary úshin baspanaly bolý qol jetpes arman bolmaýy kerek. Basynda baspanasy bar jastardyń erteńgi kúnge degen senimi artady. Qalada turǵyn-úı tapshylyǵyn azaıtý – asa mańyzdy mindet. Kelesi jyldan bastap turǵyn-úı qurylysyn jyl saıyn 10 paıyzǵa arttyrý qajet. Árıne, Almatyda bos jer az. Bul jaǵdaı qurylystyń qarqynyn kúsheıtýge kedergi keltirýi múmkin. Sol sebepti, jańa jerlerdi ıgerý kerek. Qalada 1500-ge jýyq eski úı bar. Shaǵyn aýdandarda turǵan mundaı úılerge kúrdeli jóndeý júrgizgen jón. Al, jańǵyrtýǵa kelmeıtinderin súrip tastaý qajet. Ákimdikke osy sharýany kezeń-kezeńmen júzege asyrý úshin naqty jospar ázirleýdi tapsyramyn. Jańǵyrtý jumystarynyń turǵyndarǵa qolaısyzdyq týdyrmaýyn oılastyrý kerek», - dedi Prezıdent.
