Almaty qalasynda Ortalyq Azııa elderiniń ІV Halyqaralyq teatr festıvali ótedi
ASTANA. 18 qazan. QazAqparat - 21-27 qazan aralyǵynda Almaty qalasynda Ortalyq Azııa elderiniń ІV Halyqaralyq teatr festıvali ótedi, dep habarlady QR Mádenıet jáne aqparat Mınıstrliginiń baspasóz qyzmeti.
Festıvalge Qyrǵyzstan, Tájikstan, Ózbekstan memleketteriniń jáne Qazaqstannyń teatrlary qatysady - B.Kydykeeva atyndaǵy Qyrǵyz memlekettik jasóspirimder teatry, Horog qalasy M.Nazarov atyndaǵy Tájik Memlekettik mýzykalyq komedııa teatry, Ózbekstan memlekettik óner jáne mádenıet ınstıtýty men Shyǵarmashylyq-óndiristik «Ózbekteatr» birlestigi, sondaı-aq, Qazaqstan teatrlary - Ǵ.Músirepov atyndaǵy balalar men jasóspirimderge arnalǵan Qazaq memlekettik akademııalyq teatry, Sábıt Muqanov atyndaǵy Soltústik-Qazaqstan oblystyq mýzykalyq drama teatry, Ońtústik-Qazaqstan oblystyq orys drama teatry, K.Qýanyshbaev atyndaǵy Memlekettik akademııalyq qazaq mýzykalyq drama teatry, T.Ahtanov atyndaǵy Aqtóbe oblystyq drama teatry (orys trýppasy), Respýblıkalyq nemis drama teatry jáne Aıgúl Imanbaevanyń mýzykalyq - teatrlyq ortalyǵy.
Festıvalge teatr ujymdary sońǵy úsh teatrlyq maýsymda sahnalanǵan úzdik qoıylymdardy usynýy tıis.
Festıvaldiń qazylar alqasy áıgili teatr rejısseri, Lıtvanyń Memlekettik syılyǵynyń ıegeri, Lıtvanyń orys drama teatrynyń kórkemdik jetekshisi Ionas Vaıtkýs. Sonymen qatar, qazylar alqasy quramynda belgili qazaq rejısseri, Qazaqstannyń eńbek sińirgen qaıratkeri, professor Janat Hadjıev, prozaık, aýdarmashy, dramatýrg, Tájikstannyń kórkemóner akademııasynyń korrespondent-múshesi Abdýgaffor Abdýjabborov, Qyrǵyzstannyń halyq ártisi Qyrǵyzbaı Osmonov, ádebıettanýshy, dramatýrg, Ózbekstannyń respýblıkalyq «Álem ádebıeti» jýrnalynyń bas redaktory Shýҳratılla Rızaev bar.
Arnaıy qurylǵan teatr synshylarynyń spektaklderdi qarap shyǵyp, kópshilik aldynda talqylaýy festıvaldiń negizgi baǵdarlamasyn quraıdy. Synshylardyń quramynda: Qazaqstan Respýblıkasynyń eńbegi sińirgen qyzmetkeri, ónertaný doktory Áshirbek Syǵaı, Ibragım Ýsmonov, Qyrǵyz Respýblıkasynyń Ulttyq ǵylym akademııasynyń Ch.Aıtmatov atyndaǵy til jáne ádebıet ınstıtýtynyń aǵa ǵylymı qyzmetkeri Djyldyz Toıbaeva, Ózbekstan Respýblıkasynyń Respýblıkalyq jas kórermen teatrynyń ádebı bóliminiń meńgerýshisi Mahkamova Nargısa jáne táýelsiz synshy retinde, ónertaný kandıdaty, teatrtanýshy, rejısser, Máskeý jetekshi basylymdarynan shyǵatyn qazirgi teatrlyq protsester týraly maqalalardyń jáne «Tot samyı GITIS» kitabynyń avtory Aleksandr Smolıakov.
Festıvaldiń ashylýy M.Áýezov atyndaǵy Qazaq akademııalyq drama teatrynda 21 qazanda saǵat 17.00.-de, jabylýy - 27 qazanda saǵat 11.00-de ótedi. Spektaklder M. Áýezov atyndaǵy Qazaq akademııalyq drama teatry men Ǵ. Músirepov atyndaǵy qazaq akademııalyq balalar men jasóspirim teatry ǵımaratynda ótedi.
