Almaty qalasynda múmkindigi shekteýli jandardyń maqsatty túrde emdelý máseleleri sheshilýde - Almatydaǵy dóńgelek ústel
ALMATY. 3 naýryz. QazAqparat /Názıra Eleýhan/ - Múmkindigi shekteýli jandardyń reprodýktıvti densaýlyǵyn qorǵaý máseleleri Almaty úshin de ózekti.
Bul týraly Almaty qalasy densaýlyq saqtaý basqarmasynyń bastyǵy Erkin Dúrimbetov búgin Almatyda «Qazaqstan Respýblıkasynda múmkindigi shekteýli jandarǵa medıtsınalyq kómek uıymdastyrý problemalary» degen taqyrypta ótken dóńgelek ústelde aıtty.
«Múgedek jandarǵa qatysty máselelerdiń bar ekendigin jasyra almaımyn, biraq olar maqsatty túrde sheshilýde. 2005-2010 jylǵa arnalǵan densaýlyq saqtaýdy damytýǵa arnalǵan memlekettik baǵdarlama jetistikpen aıaqtaldy. Sońǵy jyldarda qalada 23,6 mıllıard teńge somadaǵy 10 densaýlyq saqtaý nysandary qoldanysqa berildi. 350 orynǵa arnalǵan jańa jedel kómek berý emhanada múmkindigi shekteýli jandardy emdeýge barlyq jaǵdaılar jasalǵan. Bıylǵy jyly 20 medıtsınalyq mekeme qaıta jóndeýden ótedi. Bul emhanalarda múmkindigi shekteýli jandarǵa qajetti jaǵdaılar jasalynyp, arnaıy qurylǵylar qoıylatyn bolady. Osy maqsattarǵa ákimdik 1 mıllıard 23 mıllıon teńge bóldi. Sonymen qatar, osyndaı jandarǵa qyzmet kórsetetin alty ınvataksı satyp alynatyn bolady»,-dedi ol. Onyń aıtýynsha, Almatyda ár túrli kategorııadaǵy 40 000 múgedek jandar tirkelgen.
