Almaty qalasynda Qyrǵyzstandaǵy tolqýlar kezinde jappaı tártipsizdikter jasaǵany úshin memleketaralyq izdeýde júrgen top múshesi qolǵa tústi
ALMATY. Shildeniń 8-i. QazAqparat - Almatylyq polıtseıler Qyrǵyzstandaǵy tolqýlar kezinde jappaı tártipsizdikter jasaǵany úshin memleketaralyq izdeýde júrgen top múshesin qolǵa túsirdi, dep habarlaıdy qalalyq ІІD baspasóz qyzmeti.
Óz Otanynda Osh qalasynyń T. esimdi 22 jasar azamaty jappaı tártipsizdikterge qatysqany úshin ǵana emes, sonymen qatar eki mılıtsııa qyzmetkerin óltirgeni úshin de izdeýde júrgen. Ol tártipsizdik oryn alǵan jerge kelissózder júrgizýge kelgen Osh oblysy Qarasý aýdandyq ІІB bastyǵy men onyń júrgizýshisin asa qatigezdikpen óltirgen. Qylmys jasaǵannan keıin ol shekarany kesip ótip, Almaty oblysyndaǵy saıajaılardyń birinde turatyn tanysyn baryp panalaǵan.
Qylmyskerdi memleketaralyq izdeýge jarııalaǵannan keıin onyń sýreti men málimetteri Almaty qalasyna da kelip jetken edi. Sársenbi, shildeniń 7-sinde, Krımınaldyq polıtsııa basqarmasynyń izdestirý bóliminiń qyzmetkerleri «Arlan» jedel qımyldaıtyn arnaıy tobynyń jaýyngerlerimen birlese atqarǵan shara kezinde Almaty oblysynyń Іle aýdanyndaǵy Boraldaı aýylynyń «Vodnık» shaǵynaýdanynyń saıajaılarynyń birinde qylmysker qolǵa tústi. Qazirgi ýaqytta ol tutqynda, endi ony eline ekstradıtsııalaý máselesi sheshilýde.
